Read Uzbek Muqaddas Kitob Ayub 16 Bible Online

Ayub 16 - Uzbek Muqaddas Kitob bible

Ayub 16

¹Ayub shunday javob berdi:

²“Men bunday narsalarni koʻp eshitganman, Qanday noshud yupatuvchisizlar — a!

³Bu behuda gaplarning oxiri bormi oʻzi?! Shunday gapirishga sizlarni nima undaydi?!

⁴Agar sizlar mening oʻrnimda boʻlganingizda edi, Men ham sizlarday gapirsam boʻlardi. Boshimni chayqab, Sizlarga qarshi chiroyli soʻzlar aytsam boʻlardi.

⁵Ammo men soʻzlarim bilan sizlarga dalda bergan boʻlardim. Gaplarim bilan dardingizni yengillashtirardim.

⁶Hozir esa, gapirsam ham dardim yengillashmaydi, Gapirmasam ham azoblarim kamaymaydi.

⁷Ey Xudo, Sen meni ezib yubording, Butun oilamni yoʻq qilding.

⁸Yuzimni ajinlar bilan toʻldirib tashlading. Bular menga qarshi guvoh boʻladi. Ozgʻinligim ham koʻzga tashlanib, Menga qarshi guvohlik beradi.

⁹Xudo gʻazab bilan ortimdan quvib, Meni ezib tashladi. Tishlarini gʻichirlatib, Koʻzlari bilan teshadi.

¹⁰Meni koʻrib, odamlarning ogʻzilari ochilib qoldi, Ular meni mazax qilib, yuzimga urdilar. Toʻdalashib, menga qarshi chiqish uchun yigʻildilar.

¹¹Xudo meni betavfiqlar ixtiyoriga tashladi, Fosiqlarning qoʻliga berib qoʻydi.

¹²Men tinchgina yashayotgan edim, U meni parchalab tashladi, Boʻynimdan ushlab, meni ezdi. Keyin esa Xudo meni nishon qilib,

¹³Oʻz kamonlari bilan oʻrab oldi. Rahm — shafqat qilmay, Oʻqlari[41] bilan meni ilma — teshik qilib tashladi. Ichak — chovoqlarim yerga toʻkildi.

¹⁴Xudo qayta — qayta menga hujum qildi, Mening ustimga jangchiday bostirib keldi.

¹⁵Qaygʻu — alamdan qanorga burkandim[42], Qanor xuddi terimga qoʻshib toʻqilganday boʻlib qoldi, Gʻururim poymol boʻldi.

¹⁶Nolayu faryoddan yuzim qizarib, Qovoqlarim qorayib ketgan.

¹⁷Lekin qoʻllarim yovuzlikdan uzoq, Ibodatlarim pokdir.

¹⁸Ey tuproq, mening qonimni yashirma, Mening faryodim yoʻqolib ketmasin.

¹⁹Mana, hozir mening Guvohim samodadir, Mening Himoyachim yuksakda oʻtiribdi.

²⁰Doʻstlarim meni mazax qilyapti[43], Men esa Xudo oldida koʻz yosh toʻkaman.

²¹Qani endi birontasi Oʻz yaqini uchun Xudoga iltijo qilganday, Men uchun ham Xudoga yolvorsa.

²²Chunki men koʻp vaqt oʻtmay Borsa kelmas joyga ketaman.