Read Uzbek Muqaddas Kitob Ayub 18 Bible Online

Ayub 18 - Uzbek Muqaddas Kitob bible

Ayub 18

¹Shunda Shuvaxlik[47] Bildad javob berdi:

²“Qachongacha valdiraysan — a?! Gapingni oʻylab gapirgin, keyin suhbatlashamiz.

³Nima, bizni mol deb oʻylayapsanmi? Yoki bizni goʻl deb bilyapsanmi?

⁴Jahl bilan oʻzingni jarohatlayapsan. Nima endi, seni deb yer yuzi huvullab qolishi kerakmi?! Yoki qoyalar oʻrnidan qoʻzgʻalishi kerakmi?!

⁵Fosiqlarning chirogʻi albatta oʻchadi, Olovining uchquni yorugʻlik bermaydi.

⁶Chodiridagi yorugʻlik zulmatga aylanadi, Tepasida osilgan chirogʻi oʻchadi.

⁷Sobit qadam fosiqlar endi qoqilib yuradi. Oʻz rejalari ularni oyogʻidan chaladi.

⁸Oʻz oyoqlari ularni tuzoqqa yetaklaydi, Oʻzlari chuqurlikka yiqilib tushadi.

⁹Qopqon ularni tovonidan qisib qoladi, Toʻr ularni mahkam tutadi.

¹⁰Yerda fosiqlarga ilmoq tashlangan, Ularning yoʻliga tuzoq qoʻyilgan.

¹¹Har tomondan ularni vahima bosib, Har qadamda ortidan quvib yuradi.

¹²Ochlikdan ularning sillalari qurib qoladi[48], Kulfat ham ularning qoqilishini kutib turadi.

¹³Kasallik ularning terisini kemirib bitiradi, Oʻlat ularning oyoq — qoʻllarini chiritib yuboradi.

¹⁴Panohlari boʻlgan chodirlaridan ularni sugʻurib olib, Oʻliklar diyori shohining oldiga olib kelishadi.

¹⁵Fosiqlarning chodirlaridan hech narsa qolmaydi, Ular yashagan joy oltingugurt bilan qoplanadi[49].

¹⁶Ularning ildizlari qurib qoladi, Novdalari ham soʻlib qoladi.

¹⁷Yer yuzidan ularning xotirasi oʻchib ketadi, Koʻchalarda ulardan nom — nishon ham qolmaydi.

¹⁸Ular yorugʻlikdan zulmatga haydaladilar, Ha, bu dunyodan quvib chiqariladilar.

¹⁹Xalqi orasida ulardan avlod — zurriyot qolmaydi, Ular yashagan joylar kimsasiz boʻlib qoladi.

²⁰Ularning taqdiridan gʻarbdagilar dahshatga tushadi, Sharqdagilarni esa vahima bosadi.

²¹Ha, yovuzlarning maskani shu ahvolga tushib qoladi, Xudosizlarning joyi shunday boʻlib qoladi.”