Read Uzbek Muqaddas Kitob Ayub 19 Bible Online

Ayub 19 - Uzbek Muqaddas Kitob bible

Ayub 19

¹Ayub shunday javob berdi:

²“Qachongacha meni qiynaysizlar, Gaplaringiz bilan meni ezasizlar?

³Mana, meni oʻn marta haqoratladingiz! Menga hamla qilaverishdan uyalmaysizlarmi?

⁴Agar xato qilganim rost boʻlsa, Gunohim oʻzimning tashvishim.

⁵Sizlar oʻzingizni mendan ustun qoʻyyapsiz. Mana bu gunohingning dalili, deb Sharmanda boʻlganimni koʻrsatyapsiz.

⁶Shuni bilinglar, Xudoning Oʻzi menga haqsizlik qildi, Toʻrlari bilan atrofimni oʻradi.

⁷«Oʻldiryapti!» deb xitob qilsam ham, Menga hech kim javob bermaydi. Faryod qilaman, lekin adolat yoʻqdir.

⁸Xudo yoʻlimga gʻov qoʻygan, oʻtolmayman. Yoʻllarimni zulmat bilan qoplagan.

⁹U bor obroʻyimni toʻkkan, Boshimdagi tojimni tortib olgan.

¹⁰Menga har tomondan hujum qildi, tamom boʻldim, Daraxtni sugʻurganday, umidimni sugʻurib tashladi.

¹¹Uning gʻazabi menga qarshi qaynaydi, U meni Oʻziga dushman deb hisoblaydi.

¹²Uning qoʻshinlari bostirib keladi. Meni qamal qilish niyatida Chodirim atrofida qarorgoh quradi.

¹³Xudo qarindosh — urugʻimni mendan uzoqlashtirdi, Tanishlarim mendan yuz oʻgirdilar.

¹⁴Qarindoshlarim meni tark etishdi. Doʻstlarim meni unutishdi.

¹⁵Uyimga kelgan mehmonlar ham, Choʻrilarim ham menga begonaday qarashadi. Ularning nazarida bir musofirday boʻlib qoldim.

¹⁶Xizmatkorimni chaqirsam, u javob bermaydi. Unga oʻzim yalinib borishim kerak.

¹⁷Nafasim xotinimga jirkanch boʻlib qolgan, Qarindosh — urugʻim mendan nafratlanadi.

¹⁸Hatto yosh bolalar ham mendan hazar qiladi. Oyoqqa tursam, ular meni mazax qiladi.

¹⁹Hamma yaqin doʻstlarim mendan hazar qiladi. Yaxshi koʻrganlarim ham mendan yuz oʻgirdi.

²⁰Teriyu suyagimdan boshqa hech narsam qolmadi, Oʻlishimga bir baxa qoldi.

²¹Ey doʻstlarim, menga rahm qilinglar, Axir, meni Xudo urdi — ku!

²²Xudo meni quvgʻin qilganday, Nima uchun sizlar ham meni quvgʻin qilyapsizlar? Meni yeb bitirdingiz — ku! Hali ham toʻymadingizmi?

²³Qani endi, aytgan soʻzlarim yozib qoʻyilsa! Ular kitobga tushirilsa!

²⁴Temir qalamu qoʻrgʻoshin bilan[50] Qoyaga abadiy oʻyib bitilsa!

²⁵Ammo men bilaman, Mening Xaloskorim hayotdir, Vaqti kelib[51], U meni himoya qiladi[52].

²⁶Terim irib ketgan boʻlsa ham, Mana shu tanamda Xudoni koʻraman.

²⁷Men Uni oʻz koʻzlarim bilan koʻraman, Ha, men koʻraman, boshqa hech kim emas. Yuragim orziqib ketyapti!

²⁸Agar sizlar: «Mana endi unga qarshi chiqamiz! Axir, kulfatlarining ildizi oʻzida — ku», desangiz,

²⁹Oʻzingiz jazodan qoʻrqing. Xudo gʻazabi kelganda qilich bilan jazolaydi, Shunda sizlar hukm borligini bilib olasizlar.”