Read Uzbek Muqaddas Kitob Ayub 2 Bible Online

Ayub 2 - Uzbek Muqaddas Kitob bible

Ayub 2

¹Bir kuni ilohiy zotlar[8] Egamizning oldiga kelishdi. Shayton[9] ham Egamizning huzuriga keldi.

²Shaytondan Egamiz: — Qayerdan kelyapsan? — deb soʻradi. Shayton: — Yer yuzining u yogʻidan bu yogʻiga yurib, aylanib chiqdim, — deb javob berdi.

³Shaytonga Egamiz shunday dedi: — Qulim Ayubni koʻrdingmi? Yer yuzida unga oʻxshagan hech kim yoʻq. U aybsiz va solih odam. Mendan qoʻrqadi, fosiqlikdan yuz oʻgirgan. Sen esa bekorga Meni unga zarar koʻrsatishga undading. Qara, u hali ham solihligida mahkam turibdi.

⁴Shayton shunday javob berdi: — Joniga azob berib koʻr — chi, nima qilar ekan?![10] Koʻrasan, inson oʻz jonini saqlab qolish uchun hamma narsadan voz kechadi.

⁵Hozir uning tanasini dardga yoʻliqtirgin, u yuzingga qarab Seni la’natlaydi.

⁶Shaytonga Egamiz shunday dedi: — Mayli, Ayubni qoʻlingga topshirdim. Uni faqat tirik qoldirgin.

⁷Shayton Egamizning huzuridan chiqib, Ayubni boshidan oyogʻigacha jirkanchli yaralar bilan qoplab tashladi.

⁸Ayub kul uyumlari orasida, sopol parchasi bilan yaralarini qashlab oʻtirardi.

⁹Xotini unga: — Hamon solihligingizda mahkam turaverasizmi?! Xudoni la’natlang — da, oʻlib qoʻya qoling, — dedi.

¹⁰Ayub esa xotiniga shunday javob berdi: — Sen ahmoq xotinlarday gapiryapsan. Xudoning qoʻlidan yaxshi narsalarni qabul qilamiz — u, yomonlarini olmaymizmi? Shuncha azob — uqubatdan keyin ham Ayub Xudoga qarshi gapirib, gunoh qilmadi.

¹¹Ayubning boshiga tushgan kulfatlar haqida uning uch doʻsti eshitdi. Bular Temonlik Elifaz, Shuvaxlik Bildad va Namaxlik[11] Zoʻfar degan odamlar edi. Ular yigʻilishib, Ayubga hamdardlik bildirish va tasalli berish niyatida uni koʻrishga keldilar.

¹²Doʻstlari Ayubni uzoqdan koʻrib taniy olmadilar. Qattiq dod — faryod solib, kiyimlarini yirtishdi, boshlari uzra tuproq sochishdi.

¹³Ular Ayub bilan birga yetti kun — yetti kecha yerda oʻtirdilar. Mana shu kunlar davomida hech biri Ayubga gapirmadi, chunki u juda qattiq azob chekayotganini koʻrib turar edilar.