Read Uzbek Muqaddas Kitob Ayub 20 Bible Online

Ayub 20 - Uzbek Muqaddas Kitob bible

Ayub 20

¹Namaxlik[53] Zoʻfar shunday dedi:

²“Gaplaring meni bezovta qildi, Endi gapirmasam boʻlmaydi.

³Tanbehlaring bilan meni haqoratlading, Lekin endi ongim, javob ber, deb undayapti.

⁴Oʻtmishdan bilmaysanmi?! Axir, insonlar yer yuziga joylashtirilgandan beri,

⁵Fosiqlarning shodligi uzoqqa choʻzilmaydi — ku, Betavfiqlarning quvonchi bir lahzalik — ku!

⁶Takabburligi samoga yetsa ham, Boshlari bulutlarga tegsa ham,

⁷Oʻzlarining axlatiday butunlay yoʻq boʻlib ketadi. Ularni oldin koʻrganlar: «Qani endi ular?» deb soʻraydilar.

⁸Fosiqlar tushday oʻtib ketadilar, ularni topib boʻlmaydi. Kechasi koʻringan sharpaday gʻoyib boʻladilar.

⁹Ha, fosiqlarni koʻrganlar ularni boshqa koʻrmaydilar, Makonlari endi ularni tanimaydi.

¹⁰Fosiqlarning farzandlari kambagʻallardan muruvvat kutadi, Oʻz qoʻllari bilan tortib olgan boyliklarini qaytarib beradi.

¹¹Fosiqlar yosh va kuchli edi, Endi suyaklari tuproqda yotadi.

¹²Fosiqlik ularning ogʻizlarida shirin tuyuldi, Shuning uchun fosiqlikni Tillarining tagiga solib, soʻrib oʻtiribdilar.

¹³Fosiqlikni tashlagisi kelmay, Ogʻzilarida ushlab tursalar ham,

¹⁴Oʻsha yeganlari qorinlarida achchiq boʻladi, Ilonlarning zahriga aylanadi.

¹⁵Boyliklarni yutib, qaytib qusadilar, Qorinlaridan boʻlsa ham, Xudo qaytarib olib qoʻyadi.

¹⁶Ular kobra ilonlarning zaharini soʻradilar, Zaharli ilon ularni oʻldiradi.

¹⁷Endi fosiqlar oqar daryolardan — Sut va asal oqadigan irmoqlardan zavq olmaydilar.

¹⁸Zahmat bilan topganlaridan bahramand boʻlmaydilar. Savdo — sotiq qilib topganlarining gashtini surmaydilar.

¹⁹Axir, fosiqlar kambagʻallarga zulm qilib, Boʻlganicha boʻlsin, deb tashlab ketgandilar. Oʻzlari qurmagan uylarni kambagʻallardan tortib olgandilar.

²⁰Ular nafs balosiga uchragan, hech qachon qoniqmaydilar. Orzu — havas qilib yiqqan boyliklari ularni qutqarmaydi.

²¹Ular hech narsa qoldirmay, yeb bitirgandi. Shuning uchun farovonligi uzoqqa choʻzilmaydi.

²²Farovonlik davrida ham ular gʻam — tashvishga toʻladilar. Ularning boshiga ofatu kulfatlar tushadi.

²³Fosiqlar qorinlarini toʻydirib boʻlganlarida, Xudo ularga bor gʻazabini sochadi. Ularning ustiga Oʻz zarbalarini yogʻdiradi.

²⁴Fosiqlar temir quroldan qochsalar, Bronza nayza ularni teshib oʻtadi.

²⁵Nayza ularning tanalaridan sugʻurib olinadi, Ha, yaltiroq nayza ularning jigarlaridan tortib chiqariladi, Ularni vahima qamrab oladi.

²⁶Ularning xazinalari zulmatda yoʻq boʻlib ketadi. Inson yoqmagan olov ularni yutib yuboradi, Olov fosiqlarning chodiriyu undagi bor narsasini yoʻq qiladi.

²⁷Samo ularning aybini koʻrsatadi, Yer ularga qarshi guvohlik beradi.

²⁸Xudoning gʻazabi kelgan kuni Uyidagilarni sel oqizib ketadi.

²⁹Xudo fosiqlarga bergan ulush ana shulardir, Xudoning ularga tayinlagan nasibasi mana shudir.”