Read Uzbek Muqaddas Kitob Ayub 21 Bible Online

Ayub 21 - Uzbek Muqaddas Kitob bible

Ayub 21

¹Ayub shunday deb javob berdi:

²“Soʻzlarimga yaxshilab quloq soling, Mana shu sizlarning menga bergan tasallingiz boʻladi.

³Sabr qiling, men ham gapiray, Gapirib boʻlganimdan keyin, mazax qilavering.

⁴Men insonlarga emas, Xudoga arz qilyapman — ku. Shuning uchun sabrim chidamayapti — da.

⁵Mana, holimga qarang, dovdirab qolasiz, Damingiz ichingizga tushib, hang — mang boʻlasiz.

⁶Boshimga tushgan kulfatlar haqida oʻylasam, vahimaga tushaman, Tanamni qaltiroq bosadi.

⁷Nima uchun fosiqlarning umrlari uzilmay, davom etaveradi? Nega ular keksa yoshga yetadilar? Nega nufuzi oshib boraveradi?

⁸Farzandlari oʻsib, oʻz oʻrnini topganini koʻradi, Nevaralarini ham koʻrishga muyassar boʻladi.

⁹Uylari xavf — xatarsiz boʻladi, Xudoning tayogʻi ularning boshiga tushmaydi.

¹⁰Buqalari hech bir qiyinchiliksiz koʻpayaveradi, Sigirlari bolalaydi, hech qachon bolasi tushib qolmaydi.

¹¹Fosiqlarning bolalari qoʻzilarga oʻxshab sakraydilar, Farzandlari oʻynab — kulib yuraveradilar.

¹²Doira va lira sadosiga qoʻshiq kuylaydilar, Nay sadosiga oʻyin — kulgi qiladilar.

¹³Umrlari farovonlikda oʻtadi, Oʻliklar diyoriga[54] tinchgina ketadilar.

¹⁴Xudoga shunday deydilar: «Bizni tinch qoʻy! Sening yoʻllaringni bilishni xohlamaymiz.

¹⁵Qodir Xudo kim boʻlibdiki, Unga xizmat qilsak, Unga iltijo qilsak, bizga nima foyda tegardi?!»

¹⁶Ammo fosiqlarning farovonligi oʻz qoʻlining ishi emas — ku! Fosiqlarning oʻy — xayollaridan men jirkanaman.

¹⁷Fosiqlarning chirogʻi biron marta boʻlsa ham oʻchdimi? Boshiga tez — tez kulfat tushib turibdimi? Xudo Oʻz gʻazabida ularga qiynoq beryaptimi?

¹⁸Qachon ular shamolda toʻzigan xashakday, Boʻron uchirib ketgan somonday boʻladilar?

¹⁹Sen: «Xudo insonlarning gunohlari uchun Ularning farzandlarini jazolaydi», deysan. Men esa gunohkorlarning oʻzi jazolansin, deyman. Mana shu ularga saboq boʻladi.

²⁰Gunohkorlar oʻz koʻzlari bilan halokatlarini koʻrsinlar. Oʻzlari Qodir Xudoning gʻazabi sharobini ichsinlar.

²¹Zotan, ular oʻlganlaridan keyin Oilasiga nima boʻlishini oʻylamaydilar ham!

²²Kim Xudoga saboq bera oladi, Axir, U hatto samoviy zotlarni hukm qiladi — ku!

²³Mana, bir odam toʻliq farovonlikda, Tinch va xotirjam olamdan koʻz yumadi.

²⁴Uning beli baquvvat, Suyaklari ilikka toʻla.

²⁵Ikkinchi odam esa ruhi tushkun holda, Hech qachon yaxshilik koʻrmay oʻlib ketadi.

²⁶Ikkovi ham tuproqda birday yotadi, Ularni qurtlar bosib ketadi.

²⁷Eh, doʻstlarim, niyatlaringizni bilaman, Maqsadlaringiz ham menga ayon.

²⁸Sizlar: «Qani zolim amaldorning uyi? Fosiqlarning chodiri qayerda?» deb soʻraysizlar.

²⁹Koʻp joylarga borib kelganlardan soʻranglar. Ular aytganlarini inkor qila olmaysiz!

³⁰Kulfat kunida fosiqlar najot topishlarini, Xudoning gʻazab kunida qutqarilishlarini ular aytadilar — ku!

³¹Fosiqlarning qilmishlarini kim ularning yuziga soladi? Qilmishlari uchun kim ularni jazolaydi?

³²Jasadlari qabrga olib borilganda, Qabr boshiga soqchi qoʻyiladi.

³³Son — sanoqsiz odamlar ketlaridan borib, Ularga aza tutadi. Hatto tuproq ham ularning ustiga sekin tushadi.

³⁴Qanday qilib meni puch soʻzlaringiz bilan yupata olasiz? Barcha bergan javoblaringiz yolgʻondir!”