Read Uzbek Muqaddas Kitob Ayub 22 Bible Online

Ayub 22 - Uzbek Muqaddas Kitob bible

Ayub 22

¹Temonlik[55] Elifaz shunday dedi:

²“Inson Xudoga qanday foyda keltiradi?! Dono inson U uchun biror foydali ish qila oladimi?!

³Solih boʻlsang bu Qodir Xudoga qanday zavq keltiradi?! Yurgan yoʻllaring pok boʻlsa, Unga qanday foyda?!

⁴U senga xudojoʻyliging uchun tanbeh beradimi?! Buning uchun seni hukm qiladimi?!

⁵Axir, fosiqliging qanchalar ogʻir?! Gunohingning cheki yoʻq — ku!

⁶Yaqinlaringdan hech bir sababsiz garov olding, Kambagʻallardan kiyimini yechib olib[56], yalangʻoch qoldirding.

⁷Chanqaganlarga suv bermading. Qorni ochlardan noningni qizgʻanding.

⁸Ha, qudratlilar yurtga egalik qiladilar, Obroʻlilar u yerda yashaydilar.

⁹Bevalarni quruq qoʻl bilan orqaga qaytarding, Yetimlarga yordam qoʻlini choʻzmading.

¹⁰Shuning uchun atrofing tuzoqlar bilan oʻralgan. Toʻsatdan seni vahima bosgan.

¹¹Atrofingni zulmat qamrab olgan, Koʻzlaring hech narsani koʻrmayapti, Suv toshqinlari seni koʻmib ketgan.

¹²Yuksakdagi baland yulduzlarga qara. Ammo Xudo samo choʻqqisida — ku!

¹³Shunda ham sen: «Xudo nimani bilardi, Zulmat orasidan U qanday hukm qila olardi», deysan.

¹⁴«Quyuq bulutlar Uni yashirgan, U bizni koʻrmaydi, Xudo osmon gumbazi[57] uzra aylanib yuribdi — ku», deb aytasan.

¹⁵Sen fosiqlar yurgan Azaliy yoʻldan yuraverasanmi?

¹⁶Ular hayotdan bevaqt mahrum boʻldilar, Umr poydevorlarini sel yuvib ketdi.

¹⁷Fosiqlar Xudoga shunday dedilar: «Bizni tinch qoʻygin. Ey Qodir Xudo, bizga nima qila olarding?»

¹⁸Ammo ularga baraka berib, uylarini toʻldirgan Xudo — ku! Fosiqlarning oʻy — xayollaridan men jirkanaman.

¹⁹Solihlar fosiqlarning ahvolini koʻrib, xursand boʻladilar, Aybsizlar fosiqlarni mazax qilib kuladilar.

²⁰Ular: «Dushmanlarimiz yoʻq qilindi, Bitta qolmay olovda yonib ketdilar[58]», deb aytadilar.

²¹Xudo bilan tortishaverma! U bilan yarashgin, Shunda farogʻatda yashaysan.

²²Xudoning ogʻzidan chiqqan oʻgitlariga quloq tut, Soʻzlarini yuragingda saqla.

²³Qodir Xudoga yuz bursang, sogʻligu boyliging qayta tiklanadi. Chodiringni fosiqlikdan tozalasang,

²⁴Oltinni chang deb bilib, Ofir tillasini daryoga otsang,

²⁵Qodir Xudoning Oʻzi sening xazinang boʻladi. U sening qimmatbaho kumushing boʻladi.

²⁶Shunda Qodir Xudodan zavq topasan, Xudoga yuz burasan.

²⁷Sen Unga iltijo qilasan, U esa senga quloq tutadi. Unga bergan va’dalaringni bajarasan.

²⁸Nima niyat qilsang, hammasi amalga oshadi, Hayot soʻqmoqlaring nurga toʻladi.

²⁹Agar sharmanda boʻlgan odam uchun Xudoga iltijo qilsang, Xudo oʻsha odamni sharmandalikdan qutqaradi.

³⁰Sening pok qoʻllaring tufayli Hatto aybdorlar ham najot topadi.”