Read Uzbek Muqaddas Kitob Ayub 23 Bible Online

Ayub 23 - Uzbek Muqaddas Kitob bible

Ayub 23

¹Shunda Ayub yana gapirdi:

²“Bugun ham achchiq shikoyat qilaman[59], Oh — vohdan oʻzimni tuta olmayman.

³Qaniydi, Xudoni qayerdan topishni bilsam, Taxti oldiga borgan boʻlardim!

⁴Uning oldiga barcha arzlarimni yoyib, Oʻz da’volarimni aytgan boʻlardim.

⁵Oʻshanda Uning javobini tinglagan boʻlardim, Uning menga aytganlarini tushungan boʻlardim.

⁶U buyuk qudrati bilan menga qarshi chiqarmidi? Yoʻq, U menga quloq tutgan boʻlardi.

⁷Ha, solih inson Unga kelib, arzini ayta oladi. Oʻz Hakamim meni bir umrga oqlaydi.

⁸Sharqqa borsam, Xudo yoʻqdir, Gʻarbga borib ham Uni topolmayman.

⁹Shimolda biror ish qilsa, men Uni koʻrolmayman, Janub tomon burilsa ham Uni topolmayman.

¹⁰U esa mening yurgan yoʻlimni biladi, U meni sinagandan keyin sof tilladay boʻlaman.

¹¹Men faqat Xudoning yoʻlidan yurdim, Uning yoʻlini tutdim, chetga ogʻmadim.

¹²U bergan amrlardan chetga chiqmadim, Kundalik rizqimdan ham koʻra Uning soʻzlarini qimmatli bildim[60].

¹³Xudo qarorida qat’iy turadi, Kim Uning fikrini oʻzgartira oladi?! U nima xohlasa, shuni qiladi.

¹⁴Menga qarshi tuzgan rejalarini U oxirigacha bajaradi, Uning bunday rejalari hali koʻp.

¹⁵Shuning uchun Uning huzurida qoʻrquvga tushaman, Bu haqda oʻylasam, meni vahima bosadi.

¹⁶Xudo meni jur’atsiz qilib qoʻydi, Qodir Xudo meni dahshatga solib qoʻydi.

¹⁷Ammo yuzimni qoplagan tim qorongʻilik, Zulmat mening ovozimni oʻchira olmadi.