Read Uzbek Muqaddas Kitob Ayub 24 Bible Online

Ayub 24 - Uzbek Muqaddas Kitob bible

Ayub 24

¹Nima uchun Qodir Xudo hukm vaqtini belgilamaydi? Nima uchun Xudoni bilganlar bekorga Uni kutadilar?

²Fosiqlar chegaralarni buzadilar[61], Oʻgʻirlangan podalarni yaylovlarda boqadilar.

³Yetimlarning eshaklarini haydab ketadilar. Bevaning hoʻkizini kafillik sifatida olib qoʻyadilar.

⁴Kambagʻallarni yoʻldan chetga chiqarib tashlaydilar. Qashshoqlarni yashirinishga majbur qiladilar.

⁵Qashshoqlar yovvoyi eshaklarday choʻlda ovqat izlashadi, Ularning farzandlari uchun dashtdan boshqa yerda yegulik yoʻq.

⁶Begonalarning dalalarida somon yigʻishadi, Fosiqlarning uzumzorlarida qolgan — qutganini terishadi.

⁷Tunni kiyim — kechaksiz, yalangʻoch oʻtkazadi, Sovuqda ularning yopinadigan narsasi yoʻq.

⁸Togʻ yomgʻirlari ularni shalabbo qiladi, Boshpanalari yoʻqligidan ular Qoyaning oldida qaltiraydilar.

⁹Fosiqlar bevaning farzandini Onasining quchogʻidan yulib oladi, Kambagʻalning chaqalogʻini garovga oladi.

¹⁰Kiyimlari yoʻqligidan kambagʻallar yalangʻoch yurishadi. Bugʻdoy bogʻlamlarini koʻtarib yursalar — da, qorinlari och qoladi.

¹¹Qator — qator zaytun daraxtlari orasida[62] Zaytunni ezib moy chiqaradilar. Uzum siqib sharob qiladilar, Ammo chanqoqlari bosilmaydi.

¹²Shaharda jon berayotganlarning nolalari eshitiladi, Jarohatlanganlar madad soʻrab faryod qiladi. Shunda ham Xudo hech kimni bu nohaqlik uchun javobgar qilmaydi.

¹³Nurga qarshi bosh koʻtarganlar bor. Ular nur yoʻlidan yurmaydilar, Nur yoʻli olib boradigan joyga bormaydilar.

¹⁴Qotil erta tongda turadi, Kambagʻalu bechorani oʻldiradi, Kechasi esa oʻgʻrilik qiladi.

¹⁵Zinokor kech boʻlishini kutadi, «Oʻshanda meni hech kim koʻrmaydi», deb oʻylaydi. Niqob bilan yuzini berkitadi.

¹⁶Oʻgʻrilar kechasi uylarni talab, Kunduz kuni yashirinadi. Ular nur nimaligini bilmaydi.

¹⁷Barcha oʻgʻrilarning tongi zulmatdir. Ha, zulmat dahshatlari ularning doʻstidir.

¹⁸Ammo oʻsha fosiqlar daryo suvlari ustidagi koʻpikday oʻtkinchidir. Ularning yerlari la’natlangan, Ularning uzumzorlariga hech kim qadam bosmaydi.

¹⁹Issiq havo va qurgʻoqchilik qorni eritib yoʻq qilganday, Oʻliklar diyori[63] ham gunohkorni oʻz ogʻushiga oladi.

²⁰Qurtlar esa uni maza qilib kemiradi. Gunohkorni hatto oʻz onasi unutadi, Hech kim uni esga olmaydi. Fosiqlar daraxtlarday sindirib tashlanadi.

²¹Fosiqlar farzandsiz ayolga zulm oʻtkazadi, Bevalarga mehr — shafqat koʻrsatmaydi.

²²Ammo Xudo Oʻz qudrati bilan kuchlilarni halok qiladi. Ular baland koʻtarilishi mumkin, Ammo ularning hayoti uchun kafolat yoʻq.

²³Ular osoyishta yashashlariga Xudo yoʻl qoʻyadi, Ammo Oʻzi ularning yoʻllarini doim kuzatib turadi.

²⁴Hozircha ular buyuk boʻlsa ham, keyinroq yoʻq boʻladi. Ular yerga uriladi, xuddi boshqalarday oʻlib ketadi. Don boshoqlariday qurib qoladi.

²⁵Qani, kim gaplarimni yolgʻon, deb ayta oladi? Kim mening gaplarimni puchga chiqara biladi?”