Read Uzbek Muqaddas Kitob Ayub 26 Bible Online

Ayub 26 - Uzbek Muqaddas Kitob bible

Ayub 26

¹Ayub shunday deb javob berdi:

²“Ojizga bergan yordaming shumi? Kuchsizga shunday madad kerakmi?!

³Aqlsizga biram oʻrgatib qoʻyding — a! Bergan maslahatlaring biram ma’noliki!

⁴Kim oʻrgatdi oʻzi senga bu dono gaplarni?! Sen orqali kimning ruhi gapirgan oʻzi?!

⁵Suvlar ostidagi oʻliklar diyorida[65] Marhumlarning ruhi qaltiraydi.

⁶Xudoning oldida oʻliklar diyori[66] ochiqdir, Halokat diyorining[67] ham yopinchigʻi yoʻq.

⁷Xudo boʻshliq ustiga samoni yoydi, Yerni esa boʻshliqqa osib qoʻydi.

⁸Xudo bulutlarni yomgʻir suviga toʻldiradi, Bulutlar esa suvning ogʻirligidan yirtilib ketmaydi.

⁹Xudo toʻlin oyning yuzini[68] yashirib, Bulutlar bilan oʻrab qoʻyadi.

¹⁰Xudo ufqni bepoyon ummon uzra yoyib, Yorugʻlik va qorongʻilik orasiga chegara qoʻydi.

¹¹Xudo osmonning ustunlariga[69] doʻq qilsa, Ular qoʻrquvdan qaltirab tebranadi.

¹²Xudo Oʻz qudrati bilan dengizni magʻlub qildi[70], Oʻz zakovati bilan maxluq Rahobni[71] halok qildi.

¹³Oʻz nafasi bilan bulutlarni haydab, Moviy osmonni ochdi. Uning qudrati qochayotgan ilonni[72] ezib tashladi.

¹⁴Bular Xudo qilgan ishlarning kichik bir parchasidir, Xuddi pichirlab aytilgan gapga oʻxshaydi! Shunday ekan, agar Uning qudrati Momoqaldiroqday gumburlasa, kim tushuna oladi?”