Read Uzbek Muqaddas Kitob Ayub 27 Bible Online

Ayub 27 - Uzbek Muqaddas Kitob bible

Ayub 27

¹Ayub yana gap boshlab shunday dedi:

²“Menga adolat qilmay, Qalbimni yaralagan Qodir Xudo shohid!

³Tanamda Xudo ato qilgan jon bor ekan, Soʻnggi nafasimgacha,

⁴Ogʻzimdan fisqu fasod eshitilmas, Tilimdan yolgʻon soʻzlar chiqmas.

⁵Hech qachon sizlarni haq deb tan olmayman, Oʻlgunimcha aybsiz ekanligimni rad qilmayman.

⁶Ikkilanmay oʻzim haqligimni aytaveraman, Hayot ekanman, vijdonim toza mening.

⁷Dushmanim fosiqlarday jazo olsin, Raqiblarim yovuzlarday jazolansin.

⁸Xudosiz odam hayotdan mahrum boʻlganda, Unda qanday umid qoladi? Xudo uni yoʻq qilganda umidi boʻladimi?

⁹Xudosizlarning boshiga kulfat tushganda, Xudo ularning faryodiga quloq tutarmikin?

¹⁰Axir, ular Qodir Xudodan zavq topmaydilar — ku! Ular har doim ham Xudoga iltijo qilmaydilar — ku!

¹¹Xudoning qudrati haqida sizlarga oʻrgataman. Qodir Xudoning yoʻllarini sizlardan yashirmayman.

¹²Axir, oʻzingiz bularning hammasini koʻrgansiz — ku! Shunda ham bekorchi gaplarni qoʻymaysiz.

¹³Fosiqlarning taqdiri quyidagichadir, Qodir Xudo zolimlarning boshiga solgani mana shudir:

¹⁴Ularning farzandlari koʻpaysa ham, Baribir urushda halok boʻladi. Zurriyoti hech qachon nonga toʻymaydi.

¹⁵Tirik qolganlarini oʻlat nobud qiladi, Bevalari esa aza ham tutolmaydi[73].

¹⁶Kumushlari changday koʻp boʻlsa ham, Kiyim — kechaklari uyum — uyum boʻlsa ham,

¹⁷Oʻsha kiyimlarni solihlar kiyadi, Kumushlarini esa aybsizlar boʻlib oladi.

¹⁸Fosiqlarning uylari qush iniday[74] moʻrt boʻladi, Dala qorovullarining kapalari singari boʻladi.

¹⁹Fosiqlar kechqurun yostiqqa bosh qoʻyganda boy boʻlsa, Koʻzlarini ochib qaraganda, bor boyliklari yoʻqolib ketgan boʻladi.

²⁰Vahima ularni suv toshqiniday bosadi, Tunda boʻronlar ularni uchirib ketadi.

²¹Sharq shamoli ularni olib ketadi, Fosiqlarni oʻz joylaridan supurib tashlaydi.

²²Bu shamol shafqatsizlarcha ularga tashlanadi, Fosiqlar shamolning kuchidan qochishga urinadi.

²³Shamol ularning ustidan kuladi, Hushtak chalib, ularni dahshatga soladi.