Read Uzbek Muqaddas Kitob Ayub 28 Bible Online

Ayub 28 - Uzbek Muqaddas Kitob bible

Ayub 28

¹Mana, kumush qazib olinadigan konlar bor, Tilla tozalanadigan joylar ham bor.

²Temirni yerdan qazib olishadi, Toshlarni eritib, mis ajratib olishadi.

³Inson qorongʻi konlarga chiroq bilan kiradi, Hatto yer ostining eng chet joylarini ham qaziydi. Yerning qop — qorongʻi joylarigacha borib, Temir va mis qidiradi.

⁴U odamzod yashaydigan joylardan uzoqda, Inson qadam bosmaydigan yerlarda konlar qaziydi. Odamzoddan uzoq joylarda arqonlarga osilib, chuqurlarga tushadi.

⁵Mana, donu non yerdan unib chiqadi, Ammo yer osti esa yondirilganday algʻov — dalgʻov boʻlib yotibdi.

⁶Yerdagi toshlardan zangori yoqutlar chiqadi, Tuprogʻida tilla bor.

⁷Hech bir quzgʻun konlarning yashirin soʻqmoqlarini bilmaydi, Hech bir burgutning koʻzlari u joylarni koʻrmagan.

⁸Yovvoyi hayvonlar u yerlarga oyoq bosmagan, Sherlar ham u yerlardan yurmagan.

⁹Inson qoyalarni oʻyadi, Togʻlarni tag — tugi bilan qoʻporib tashlaydi.

¹⁰Qoyalar orasidan yoʻllar ochadi, Inson koʻzlari hamma bebaho xazinalarni koʻradi.

¹¹Inson daryolarning manbaini topadi[75], Yashirin xazinalarni yorugʻlikka olib chiqadi.

¹²Ammo donolikni qayerdan topsa boʻladi?! Idrokning manbayi qayerda ekan?!

¹³Odamzod donolikning qayerda ekanligini[76] bilmaydi, Chunki yorugʻ yer yuzida donolik topilmaydi.

¹⁴Tubsiz suvlar, donolik bizda emas, deydilar, Dengiz ham, mening ichimda u yoʻq, deb aytar.

¹⁵Donolikni tillaga sotib olib boʻlmaydi, Uning narxini kumush bilan oʻlchab boʻlmaydi.

¹⁶Donolik Ofir tillasiyu aqiq toshlar, Zangori yoqutlar bilan ham sotib olinmaydi.

¹⁷Tilla ham, billur ham donolikka teng kelmaydi, Donolikni toza tilla taqinchoqlarga almashtirib boʻlmaydi.

¹⁸Donolikning qadri gavhardan ham balanddir, Marjon va javohirlar uning oldida qadrsizdir.

¹⁹Habashistonning[77] javohiri ham unga teng kelolmaydi, Eng sof tilla bilan ham donolikni sotib olib boʻlmaydi.

²⁰Shunday ekan, donolik qayerdan kelib chiqadi? Idrokning manbayi qayerda?

²¹U barcha jonzotlarning koʻzlaridan yashirilgan, Hatto osmondagi qushlardan ham berkitilgan.

²²Hatto Halokat[78] va Oʻlim[79] ham, Biz donolik haqida faqat eshitganmiz, deb aytadi.

²³Donolikka olib boradigan yoʻlni Xudo biladi, Donolikning maskanini faqatgina U biladi.

²⁴Zotan, Xudo yerning toʻrt tomonini ham koʻrib turadi, Falak ostidagi hamma narsani kuzatib turadi.

²⁵Xudo shamolga kuch bergan, Dengizning hajmini belgilagan.

²⁶Yomgʻirning qayerga yogʻishini U koʻrsatib bergan, Chaqmoq uchun yoʻllarni belgilagan.

²⁷Oʻshanda Xudo donolikka qaradi — da, Donolikning qadrini belgiladi. Uni tekshirib koʻrib, barqaror qildi.

²⁸Xudo odamzodga shunday dedi: «Men, Rabbingizdan qoʻrqish donolikdir, Fosiqlikdan yuz oʻgirish idrokdandir.»”