Read Uzbek Muqaddas Kitob Ayub 29 Bible Online

Ayub 29 - Uzbek Muqaddas Kitob bible

Ayub 29

¹Ayub gapida davom etdi:

²“Qani endi, Xudo menga Gʻamxoʻrlik qilgan paytlari qaytib kelsa edi.

³Oʻsha paytlarda Xudo Oʻz chirogʻi bilan yoʻlimni yoritardi, Uning nuri bilan zulmatdan oʻtar edim.

⁴Kuch — quvvatga toʻlgan kezlarimda Xudo bilan boʻlgan doʻstligim chodirimni toʻldirib turardi.

⁵Qodir Xudo men bilan edi, Farzandlarim ham atrofimda yurardi.

⁶Uyimda qaymoq oshib — toshib yotardi, Zaytunzorlarimdan moy ariq boʻlib oqardi.

⁷Shahar darvozasi oldida oʻtirganimda, Yoʻlboshchilar orasidan joy olganimda,

⁸Yoshlar meni koʻrib, yoʻl berardi, Hatto keksalar ham oʻrnidan turardi.

⁹Oqsoqollar ham gapidan toʻxtardi, Dami ichiga tushib ketardi.

¹⁰Boshliqlarning ham ovozi tinardi, Tillari tanglayiga yopishib qolardi.

¹¹Gaplarimni eshitganlar meni maqtardi, Koʻrganlar men haqimda yaxshi gapirardi,

¹²Axir, men nola qilgan yoʻqsillarga yordam berardim, Suyanchigʻi yoʻq yetimlarni chetda qoldirmas edim.

¹³Oʻlimdan qutqarilgan bu odamlar meni duo qilardilar, Yordamim bilan bevalarning qalbini quvonchga toʻldirardim.

¹⁴Solihlikka kiyim kabi oʻrangandim, Odillikni sallam va toʻnimday kiyib yurardim.

¹⁵Koʻrlarga koʻz boʻldim, Choʻloqlarga oyoq boʻldim.

¹⁶Faqirlarga ota boʻldim, Musofirlarning arzlarini eshitib, himoya qildim.

¹⁷Zolimlarning tishlarini sindirdim, Ularning ogʻzidan oʻljasini tortib oldim.

¹⁸Men shunday deb oʻylardim: «Uzoq umr koʻrib, oʻz uyimda hayotdan koʻz yumaman.

¹⁹Axir, men ildizlari suvga yetgan, Shoxlarida tun boʻyi shabnam turadigan daraxtdayman.

²⁰Doimo obroʻyim baland boʻlaveradi, Kuchim qayta — qayta yangilanaveradi.»

²¹Hamma sukut saqlab, menga quloq solardi, Bizga qanday maslahat berarkan, deb kutardi.

²²Mening soʻzlarimdan keyin hech kim gap qoʻshmasdi, Soʻzlarim ularning ustiga shabnamday ohista tushar edi.

²³Ular yomgʻir kutganday meni kutishardi, Soʻzlarim bahor yomgʻiri singari ularga singib ketardi.

²⁴Ularga kulib qarasam, koʻzlariga ishonishmasdi, Marhamat qilishimni umid bilan kutishardi.

²⁵Ularga bosh boʻlib, yoʻl — yoʻriq koʻrsatardim, Lashkarlari orasidagi shohday yashar edim, Ular qaygʻuga tushganlarida tasalli berardim.