Read Uzbek Muqaddas Kitob Ayub 3 Bible Online

Ayub 3 - Uzbek Muqaddas Kitob bible

Ayub 3

¹Oxiri Ayub soʻz boshlab, oʻzi dunyoga kelgan kunni la’natladi.

²U shunday dedi:

³“Men tugʻilgan kun qirilib ketsin, Men yaratilgan kecha la’nati boʻlsin.

⁴Oʻsha kun zulmatga aylanib qolsin! Hatto Xudo ham shu kunni eslamasin, Oʻsha kun hech qachon nur koʻrmasin.

⁵Zimziyo zulmat uni qamrasin, U kunni bulutlar berkitsin, Quyosh nurini qorongʻilik toʻsib qoʻysin.

⁶Ha, oʻsha kechani zulmat yutib yuborsin! Yil kunlari orasida hech qachon sanalmasin, Oylarning hisobiga oʻsha kecha kirmasin.

⁷Oʻsha kecha qisir boʻlsin, Undan shodlik ovozi yangramasin.

⁸Maxluq Levitanni[12] chaqirishga qodir boʻlganlar uni qargʻasin, Ha, la’nat oʻqiydiganlar oʻsha kechaga qargʻish yogʻdirsin.

⁹Oʻsha kechada tong yulduzlari charaqlamasin. Oʻsha kecha yorugʻlikka umid qilsin — u, Ammo tong shu’lasini koʻrmasin.

¹⁰Onamning bachadonini berkitmagani uchun, Meni shuncha qaygʻudan xoli qilmagani uchun Oʻsha kecha la’nati boʻlsin.

¹¹Nima uchun oʻlik tugʻilmadim?! Onam qornidan tushiboq, oʻlmadim?!

¹²Nima uchun onam meni tizzalarida olib oʻtirdi ekan?! Nima uchun meni emizdi ekan?!

¹³Oʻlganimda edi, hozir tinch yotgan boʻlardim. Uxlab, orom olib yotgan boʻlardim.

¹⁴Vayronalarni tiklashga qodir boʻlgan Shohu amaldorlar bilan birga boʻlardim.

¹⁵Tillaga boy, uylarini kumushga toʻldirgan Shahzodalar qatori yotgan boʻlardim.

¹⁶Nima uchun oʻlik tugʻilgan boladay boʻlmadim?! Nima uchun yorugʻlik koʻrmagan chaqaloqday koʻmilmadim?!

¹⁷Axir, qabrda fosiqlar ham Fosiqlik qilishdan toʻxtaydilar — ku! Charchaganlar ham dam oladilar — ku!

¹⁸Asirlar u yerda jam boʻlib tinch yashaydi, Nazoratchilarning baqir — chaqiri eshitilmaydi.

¹⁹Katta ham, kichik ham u yerda bordir, Qullar ham nihoyat u yerda ozoddir.

²⁰Nima uchun qiynalganga yorugʻlik berilgan, Qaygʻuga botganga esa hayot ato qilingan?!

²¹Ular oʻlimni kutadilar, lekin oʻlim kelmaydi, Qimmatbaho xazinadan ham koʻra, Koʻproq oʻlimni izlaydi ular.

²²Oʻlim topganlarida ular juda quvonadi, Shodlikdan boshlari osmonga yetadi.

²³Nima uchun yoʻlni koʻrolmaydiganlarga yorugʻlik berilgan?! Axir, Xudo ularning yoʻlini toʻsib qoʻygan — ku!

²⁴Non yeyish oʻrniga ogʻir uf tortaman, Chuqur ohu nolalarim suvday oqib chiqyapti.

²⁵Ha, nimadan qoʻrqqan boʻlsam, oʻsha boshimga tushdi. Xavfsiraganlarim sodir boʻldi.

²⁶Koʻnglim tinch emas, menda xotirjamlik yoʻq, Tinchlik yoʻq, gʻam — tashvish esa kelaveradi.”