Read Uzbek Muqaddas Kitob Ayub 32 Bible Online

Ayub 32 - Uzbek Muqaddas Kitob bible

Ayub 32

¹Shunday qilib, oʻsha uch kishi Ayubga boshqa gapirmadilar, chunki Ayub oʻz nazarida solih edi.

²Ammo Buz avlodining[82] Ram xonadonidan boʻlgan Boraxiyol oʻgʻli Elixuning jahli chiqdi. Ayub oʻzini oqlab, Xudoni ayblayotgani uchun undan qattiq gʻazablandi.

³U Ayubning uchala oʻrtogʻidan ham juda qattiq achchiqlandi, chunki ular Ayubning gapiga javob topib bera olmadilar. Natijada Xudo aybdorday boʻlib qoldi[83].

⁴Elixu gapirish uchun oʻz navbatini kutib turardi, chunki boshqalarning yoshi unikidan ulugʻroq edi.

⁵Lekin ularning boshqa gapi yoʻqligini koʻrib, Elixuning jahli chiqdi.

⁶Shunday qilib, Buz avlodidan boʻlgan Boraxiyol oʻgʻli Elixu oʻz gapini boshladi: “Men yoshman, Sizlarning esa yoshingiz ulugʻ. Shuning uchun uyalib, Fikrlarimni aytishga qoʻrqdim.

⁷Yoshi ulugʻlar gapirsin, Koʻpni koʻrganlar aql oʻrgatsin, dedim.

⁸Ammo faqatgina yoshi ulugʻlar dono boʻlmaydi, Nima toʻgʻriligini faqat keksalar tushunavermaydi. Axir, insonga uning ichidagi ruh — Qodir Xudoning nafasi aql — idrok beradi — ku!

¹⁰Shuning uchun menga quloq soling, Men ham oʻz fikrimni bayon qilay.

¹¹Sizlar gapirganda jim turdim, Dono gaplaringizga quloq soldim. Gap qidirganingizda ham kutib turdim.

¹²Sizlarga diqqat bilan quloq soldim, Lekin hech biringiz Ayubning aybini isbotlay olmadingiz. Uning gaplariga javob bera olmadingiz.

¹³Sizlar: «Eng dono yoʻlni topdik, Ayubni inson emas, Xudoning Oʻzi magʻlub qilsin», deya koʻrmanglar.

¹⁴Ayub gaplarini menga qarata aytgani yoʻq. Shunday boʻlganda ham, Men hech qachon sizlarga oʻxshab javob bermasdim.

¹⁵Ey Ayub! Bu uchala oʻrtogʻingiz esankirab qoldi, Gap topolmay oʻtiribdilar. Aytadigan bironta soʻzi yoʻq.

¹⁶Endi ularning aytadigan gapi boʻlmasa, Men kutib oʻtiraveraymi?!

¹⁷Men ham javob beraman, Oʻz fikrimni bildiraman.

¹⁸Ichimda soʻzlar toshib ketyapti, Ruhim meni da’vat qilyapti.

¹⁹Qalbim ochilmagan sharob kabi joʻshmoqda, Yangi sharob quyilgan mesh kabi yorilib ketay, deydi[84].

²⁰Gapirib, ozgina yozilay. Ogʻiz ochib, javob beray.

²¹Men hech kimga tarafkashlik qilmayman, Hech bir insonga xushomad qilmayman.

²²Agar xushomadgoʻylikka usta boʻlsam, Yaratuvchim meni yoʻq qilgan boʻlar edi.