Read Uzbek Muqaddas Kitob Ayub 33 Bible Online

Ayub 33 - Uzbek Muqaddas Kitob bible

Ayub 33

¹Ey Ayub, endi mening soʻzlarimni eshiting, Hamma gaplarimga quloq soling.

²Men hozir gapirishga tayyorman. Soʻzlarim tilimda tizilib turibdi.

³Soʻzlarim pok koʻnglimdan chiqadi, Chin dildan gapiraman.

⁴Meni Xudoning Ruhi yaratgan, Qodir Xudoning nafasi menga hayot berib turibdi.

⁵Agar qoʻlingizdan kelsa, menga javob bering — chi, Oʻzingizni himoya qilib koʻring — chi!

⁶Xudoning oldida siz ham, men ham birmiz, Men ham tuproqdan yaralganman.

⁷Mendan qoʻrqmasangiz ham boʻladi, Sizga hech zulm oʻtkazmayman.

⁸Gaplaringizni oʻz qulogʻim bilan eshitdim, Quyidagi soʻzlarni oldimda aytgansiz:

⁹«Men pokman, aybsizman, Top — tozaman, menda hech bir ayb yoʻq.

¹⁰Xudo esa menga qarshi chiqishga bahona qidiryapti, Meni Oʻz dushmanlari qatoriga qoʻshib qoʻydi.

¹¹Oyoqlarimni zanjirband qildi, Yurgan yoʻlimni kuzatib turadi.»

¹²Ayub, mana shu borada siz nohaqsiz. Men sizga shuni aytay: Xudo butun odamzoddan ulugʻroqdir.

¹³Shunday ekan, nimaga U bilan da’volashyapsiz? Nima uchun, Xudo menga javob bermaydi, deysiz?

¹⁴Xudo qayta — qayta gapiradi. Shunda ham odamlar tushunmaydi.

¹⁵Odamlar chuqur uyquga ketganda, Oʻrinlarida uxlab yotganda, Tushlar, tungi vahiylar orqali

¹⁶Xudo ularning quloqlariga gapiradi, Oʻz ogohlantirishlari bilan ularni qoʻrqitadi.

¹⁷Inson gunohlaridan qaytsin, Odamzod takabbur boʻlmasin deb, bu soʻzlarni aytadi.

¹⁸Oʻsha ogohlantirishlar odamlarni qabrdan saqlaydi, Oʻlim daryosidan[85] qutqaradi.

¹⁹Xudo insonlarga dardu ogʻriq berib, Odamlarning suyaklarini zirqiratib, tarbiyalaydi.

²⁰Shunda ular nonga ham qaray olmaydigan boʻlib qoladi. Hatto eng shirin ovqatlar ham koʻnglini aynitadi.

²¹Ular ozib — toʻzib ketadi, faqat terisi qoladi. Oldin koʻrinmagan suyaklari endi turtib chiqadi.

²²Ana, ular qabrga yaqinlashib qoldi. Oʻlim ularning jonini poylab turibdi.

²³Lekin shu paytda insonning himoyachisi boʻlsa, Minglarga qarshi chiqib, Oʻsha insonni solih deb tasdiqlaydigan bir himoyachisi

²⁴Oʻsha insonga rahm qilib: «Ey Xudoyim, uni qabrdan qutqargin, Bu insonning joni evaziga toʻlov topdim», desa,

²⁵Oʻsha insonning tanasi yosh bolaniki kabi yangilanadi, Yoshligidagi kabi yana kuchga toʻladi.

²⁶Oʻsha inson Xudoga ibodat qiladi, Xudo esa uni qabul qiladi. Xudoning huzuriga u shodlik bilan kiradi, Chunki Xudo uni solihlik yoʻliga qaytaradi.

²⁷Oʻsha inson kelib, boshqalarga shunday deydi: «Mana, men toʻgʻri yoʻldan yurmasdan, Gunoh qilgan edim, Lekin men oʻzimga loyiq jazoni olmadim.

²⁸Xudo jonimni qabrdan qutqarib qoldi. Endi mening hayotim yorugʻ kunlarga toʻla!»

²⁹Ha, Xudo odamzodga shunday qiladi, Bir emas, ikki emas, koʻp marta takrorlaydi.

³⁰Insonlarni qabrdan saqlash uchun, Hayot nuri ularning yoʻllarini yoritsin deb, shunday qiladi.

³¹Ey Ayub, diqqat qiling, menga quloq soling, Jim turing, men gapiray.

³²Agar biror gapingiz boʻlsa, menga javob bering. Gapiravering, chunki oqlanishingizni xohlayman.

³³Lekin gapingiz boʻlmasa, menga quloq soling, Sukut saqlang, men sizga donolikni oʻrgatay.”