Read Uzbek Muqaddas Kitob Ayub 34 Bible Online

Ayub 34 - Uzbek Muqaddas Kitob bible

Ayub 34

¹Elixu gapida davom etib shunday dedi:

²“Mening soʻzlarimni tinglang, ey donishmandlar[86]. Menga quloq soling, ey bilimdonlar.

³Til taomning ta’mini tatiganday, Quloq ham soʻzlarni sinab koʻradi.

⁴Kelinglar, nima toʻgʻriligini tanlaylik, Nima yaxshiligini birgalikda oʻrganaylik.

⁵Ayub shunday deydi: «Men aybsizman, Lekin Xudo menga adolat qilmayapti.

⁶Toʻgʻri boʻlsam ham, meni yolgʻonchiga chiqarishdi. Gunohsiz boʻlsam ham tuzalmas dardga yoʻliqqanman.»

⁷Ayubga oʻxshagan odam bormi? Ayub uchun Xudoga shak keltirish suv ichishday bir gap!

⁸Uning oʻrtoqlari badkirdorlardir, U fosiqlar bilan vaqt oʻtkazadi.

⁹Ayub hatto shunday degan: «Xudoga yoqadigan ish qilishdan hech bir foyda yoʻq!»

¹⁰Shuning uchun menga quloq soling, zakovatlilar. Xudo aslo fosiqlik qilmas, Qodir Xudo nohaqlik qilmas.

¹¹Axir, U odamlarning qilganlariga yarasha qaytaradi, Qilmishlarining oqibatini oʻz boshlariga keltiradi.

¹²Mana bu haqiqatdir: Xudo fosiqlik qilmaydi, Qodir Xudo adolatga xiyonat etmaydi.

¹³Xudoga yer yuzidagi hukmronlikni birov beribdimi?! Biror kimsa Xudoni dunyoga hukmdor qilib qoʻyibdimi?!

¹⁴Agar Xudo Oʻz nafasini Qaytarib olishga qaror qilsa,

¹⁵Butun insoniyat birdaniga halok boʻlgan boʻlardi, Odamzod yana tuproqqa qaytgan boʻlardi.

¹⁶Aqlingiz boʻlsa eshiting, Gaplarimga quloq soling.

¹⁷Adolatdan nafratlangan inson hukmdor boʻla olarmidi? Qudratli va odil Xudoni hukm qilmoqchimisiz?

¹⁸Shohlarga: «Sizlar yaramassiz», deydigan, Beklarni fosiq deb ataydigan Xudo — ku!

¹⁹U beklar uchun tarafkashlik qilmaydi, Boyni kambagʻaldan ustun koʻrmaydi. Axir, ularning hammasini Oʻzi yaratgan!

²⁰Odamlar bir zumda oʻladi. Yarim kechada qaltiraydi — yu, jon beradi. Qudratlilar osonlikcha yoʻq qilinadi.

²¹Odamlar qilgan ishlarni Xudo kuzatib turadi, Ular bosgan har bir qadamni Xudo koʻrib turadi.

²²Biron zulmat yoki qorongʻi joy yoʻqki, Badkirdorlar oʻsha joyda yashirinib olsa.

²³Insonni hukm qilish uchun Xudo taftish oʻtkazishi shart emas[87].

²⁴Xudo tekshirmasdan ham qudratlilarni qulatib, Ularning oʻrniga boshqalarni joylaydi.

²⁵Xudo qudratlilarning ishlarini kuzatib turadi. Shuning uchun kechasi ularni agʻdarib tashlaydi, Ular halok boʻladi.

²⁶Xudo ularni fosiqligi uchun Hammaning koʻzi oldida jazolaydi.

²⁷Chunki ular Xudoga ergashishni rad qildilar, Xudoning yoʻllarini anglab yetmadilar.

²⁸Kambagʻallarni shunday ezdilarki, Ularning nolasi Xudoga yetib bordi.

²⁹Xudo sukut saqlasa, kim ham Uni hukm qilardi? U yuzini yashirsa, kim koʻra olardi? Bu biror inson yoki biror xalqning qoʻlidan kelarmikan?!

³⁰Betavfiqlar boshqa odamlarga tuzoq boʻlmasin deb, Xudo ularni hukmdor qilib qoʻymaydi.

³¹Birortasi Xudoga: «Men jazoimni oldim, endi gunoh qilmayman.

³²Men koʻrolmaydigan narsalarni oʻrgat, Ha, notoʻgʻri ishlar qildim, Endi bunday qilmayman», — deydimi?

³³Xudo sizning oʻlchovingiz boʻyicha qaytarishi kerakmi? Axir, siz Undan nafratlandingiz — ku! Ey Ayub, men emas, siz qaror qilishingiz kerak. Qani, bilganingizni ayting — chi.

³⁴Mana, gaplarimni eshitgan donolar, Aql — idroklilar shunday deyapti:

³⁵«Ayub bilmasdan gapiryapti, Gaplarining ma’nisi yoʻq.»

³⁶Qani endi, Ayub yaxshilab hukm qilinsa, Axir, u fosiqlarga oʻxshab gapiryapti — ku.

³⁷Ayub Xudoga qarshi chiqib, Gunohi ustiga gunoh qoʻshyapti. Oramizda Xudoni mazax qilyapti, Xudoga qarshi koʻp gap aytyapti.”