Read Uzbek Muqaddas Kitob Ayub 35 Bible Online

Ayub 35 - Uzbek Muqaddas Kitob bible

Ayub 35

¹Elixu gapini davom ettirib, shunday dedi:

²“Ey Ayub: «Xudoning oldida aybsizman», — deb aytishingiz notoʻgʻri.

³Siz Xudoga: «Gunohsizligim Menga yaxshilik keltirishi kerak edi — ku! Ammo men yomonlik koʻrdim!» — deb aytishingiz ham toʻgʻri emas.

⁴Siz va doʻstlaringiz gapimni eshitinglar.

⁵Osmonga qarab koʻringlar, Sizlardan ancha tepada boʻlgan bulutlarga qaranglar.

⁶Itoatsizlik qilsangiz, Xudoga nima zarar? Gunohlaringiz koʻpaysa, Xudoga nima?

⁷Bordi — yu, solih boʻlsangiz, Unga nima qilib berardingiz? U sizning qoʻlingizdan biror narsa olishga zormi?

⁸Fosiqligingizdan faqat insonlar qiynaladi. Solihligingiz ham faqatgina insonlarga madad beradi.

⁹Zulm haddan tashqari koʻp boʻlgani uchun odamlar faryod qiladi. Zoʻravonlarning qoʻlidan qutqaringlar, deb yordam soʻraydi.

¹⁰Ammo hech kim Yaratuvchiga yolvormaydi. Tunlari umid beradigan Xudoga iltijo qilmaydi.

¹¹U esa yer yuzidagi jonivorlarga qaraganda bizga koʻproq bilim bergan — ku! Bizni osmondagi qushlardan aqlliroq qilgan — ku!

¹²Zulm ostida qolgan insonlar faryod qilishsa ham, Xudo javob bermaydi. Axir, ularning oʻzlari takabbur va fosiqdir.

¹³Xudo bunday insonlarning puch soʻzlariga umuman quloq solmaydi, Qodir Xudo ularga e’tibor bermaydi.

¹⁴Ey Ayub! Siz: «Xudoni koʻrmayapman», deysiz. Da’voingizni Unga keltirdingiz, endi sabr qiling!

¹⁵Siz: «Xudo gʻazabini sochmayapti, Fosiqlikka zarracha e’tibor bermayapti», deb oʻylaysiz.

¹⁶Shunday qilib, Ayub bema’ni gaplarni gapiryapti. Hech nima bilmay turib, gapni koʻpaytiryapti.”