Read Uzbek Muqaddas Kitob Ayub 36 Bible Online

Ayub 36 - Uzbek Muqaddas Kitob bible

Ayub 36

¹Elixu gapida davom etib shunday dedi:

²“Yana bir oz sabr qiling, men sizlarga koʻrsatay, Xudo tomonida turib gapiradigan gaplarim bor hali.

³Mening bilimim juda koʻp, Meni yaratgan Xudo odil ekanligini sizlarga koʻrsataman.

⁴Rostini aytaman, soʻzlarim yolgʻon emas. Mana men, bilimi barkamol inson, sizning oldingizdaman.

⁵Xudo qudratlidir, Ammo U insonlardan nafratlanmaydi, Xudo qudratli va barqarordir.

⁶Fosiqlarning yashashiga Xudo yoʻl qoʻymaydi, Ezilganlarga esa adolat qiladi.

⁷Solihlardan yuz oʻgirmaydi, Solihlarni shohlar bilan birga taxtga chiqaradi, Ularni to abad yuksaltiradi.

⁸Agar insonlar zanjirband boʻlsa, Azob ularni iskanjaga olgan boʻlsa,

⁹Xudo ularning qilmishlariniyu gunohlarini oʻzlariga koʻrsatadi, Ular magʻrurlanib ketganlarini oshkor qiladi.

¹⁰Yoʻl — yoʻriqlarini tinglashga majbur qiladi, Yovuzlikdan qaytishga amr qiladi.

¹¹Agar ular itoat etib, Xudoga xizmat qilsalar, Qolgan umrlarini farovonlikda oʻtkazadilar, Hayotlari rohatda oʻtadi.

¹²Ammo itoat etmasalar, Ular oʻlim daryosiga gʻarq boʻladilar[88], Aql — idrokka erishmay, olamdan oʻtadilar.

¹³Xudosizlar alamini ichiga yutib yuraveradilar, Xudo ularni kishanlasa ham yordam soʻramaydilar.

¹⁴Ular sajdagohlardagi fohishlar[89] orasida, Yoshliklaridayoq vafot etadilar.

¹⁵Xudo qiynalganlarni oʻsha azoblari orqali qutqaradi, Zulm va jabr — jafoga mubtalo qilib, ularning koʻzlarini ochadi.

¹⁶Xudo sizni ham darddan ozod qilib, Bepoyon kenglikka olib chiqadi, Dasturxoningiz noz — ne’matga toʻladi.

¹⁷Ammo siz hozir fosiqlarni hukm qilish bilan ovorasiz. Xayolingiz adolat va hukm bilan band.

¹⁸Ehtiyot boʻling, yana birov sizni boylik bilan vasvasaga solmasin, Katta poralar sizni yoʻldan urmasin.

¹⁹Boyliklaringiz sizni kulfatdan qutqara olarmidi?! Qudratu — kuchingiz endi sizga yordam bera olarmidi?!

²⁰Tunni kutavermang[90], Axir, xalqlar kechasi yoʻq boʻlib ketadilar — ku!

²¹Hushyor boʻling! Fosiqlikka yuz burmang, Axir, dard sizni fosiqlikdan saqlash uchun yuborilgan — ku.

²²Xudo Oʻz qudrati tufayli yuksakdir! Unga oʻxshash ustoz bormi?

²³Kim Xudoga yoʻl koʻrsata olardi?! Kim Unga: «Qilganlaring notoʻgʻri», deya oladi?!

²⁴Xudo qilgan ishlari uchun Insonlar Uni madh qiladilar, Siz ham doimo ularga joʻr boʻling.

²⁵Butun inson zoti Uning ishlarini koʻrgan, Hamma uzoqdan turib kuzatadi.

²⁶Xudo qanchalar buyuk! Uning buyukligiga aqlimiz yetmaydi, Xudoning umrini hisoblaydigan sonning oʻzi yoʻq.

²⁷U suv tomchilarini yigʻib, Ularni yomgʻirga aylantiradi.

²⁸Bulutlardan yomgʻir yogʻdiradi, Odamzod bundan bahramand boʻladi.

²⁹Xudo qanday qilib bulutlarni yurgizishini Yoki Oʻz maskanidan turib, momaqaldiroqni qanday gumburlatishini Kim ham tushuna oladi?

³⁰Mana, qaranglar, Xudo shunday chaqmoq chaqtiradiki, Hatto dengiz tubi ham yorishib ketadi[91].

³¹Xudo Oʻz qudratli ishlari bilan xalqlarni boshqaradi, Ularga farovonlik ato qiladi.

³²Chaqmoqni qoʻliga olib, Belgilagan joyiga borib urishni amr qiladi.

³³Boʻron kelayotganini momaqaldiroq bildirib turadi, Hatto chorva ham oldindan sezadi[92].