Read Uzbek Muqaddas Kitob Ayub 37 Bible Online

Ayub 37 - Uzbek Muqaddas Kitob bible

Ayub 37

¹Mana shular haqida oʻylasam, Yuragim oʻynab, joyida sakraganday boʻladi.

²Xudo ovozining gumburlashiga yaxshilab quloq soling. Uning ogʻzidan chiqayotgan guldirosni eshiting.

³Chaqmogʻi butun falak ostida chaqnab, Yerning toʻrt burchiga yetib boradi.

⁴Undan keyin gulduros eshitiladi, Xudo Oʻzining ulugʻvor ovozi bilan gumburlagan sado chiqaradi, Uning ovozi eshitilganda chaqmoq chaqnayveradi.

⁵Oʻz ovozi bilan Xudo ajoyib gulduros hosil qiladi, Uning qilgan ishlariga aqlimiz yetmaydi.

⁶U buyursa yerga qor yogʻadi, Xudo aytgani uchun sel yogʻadi.

⁷U hamma odamlarning ishlarini toʻxtatib qoʻyadi, Shunda insonlar Xudoning qudratini bilib oladi.

⁸Jonivorlar oʻz inlariga kiradi, Oʻz uyalarida yashirinadi.

⁹Boʻron oʻz makonidan chiqadi, Sovuq shamol esadi.

¹⁰Xudo nafasi bilan muz hosil qiladi, Bepoyon suvlar muzlab qoladi.

¹¹Bulutlarni suv bilan toʻldiradi — da, Ularning orasidan chaqmoq chaqtiradi.

¹²Xudo bulutlarga yoʻl koʻrsatadi, Xudoning amrlari bajo boʻlishi uchun Shamolu suv yer yuzi boʻylab aylanadi.

¹³U ba’zan, odamzodni jazolay deb, yomgʻir yogʻdiradi. Ba’zan esa yerni sugʻoray, Odamzodga Oʻz sevgimni koʻrsatay deb, bulutlarni yuboradi.

¹⁴Bir daqiqa jim turing, Ayub, quloq soling, Xudoning ajoyib ishlari haqida oʻylab koʻring.

¹⁵Xudo qanday qilib bulutlarni boshqarishini Yoki chaqmoq chaqtirishini bilasizmi?

¹⁶Qanday qilib bulutlar osmonda osilib turishini, Bilimi barkamol Xudoning ajoyibotlarini bilasizmi?

¹⁷Axir, yer yuzida esgan garmsel[93] tufayli Kiyimlaringiz ham isib ketadi — ku!

¹⁸Osmon sayqallangan bronzaday qattiq[94], Xudo uni yoyib qoʻygan! Shunday qilish sizning ham qoʻlingizdan keladimi?

¹⁹Xudoga qanday gapirishni bizga oʻrgating. Biz notavonlar da’voimizni tushuntira olmaymiz.

²⁰Gapirmoqchi boʻlganimni birortasi Xudoga aytishi kerakmi? Axir, inson gapirsa, albatta halok boʻladi — ku!

²¹Shamol bulutlarni haydagandan soʻng Tiniq osmonda charaqlab turgan quyoshga Hech kim qaray olmaydi.

²²Shimoldan yorqin nurlar taralmoqda, Xudo ajoyib ulugʻvorlikka burkangan.

²³Biz Qodir Xudoga yetolmaymiz, Uning qudrati yuksakdir. U toʻgʻri hukm chiqaradi, adolatiga xiyonat qilmaydi.

²⁴Shuning uchun insonlar Undan qoʻrqadi. Ha, qalbi donolar Xudoni koʻradi[95].”