Read Uzbek Muqaddas Kitob Ayub 38 Bible Online

Ayub 38 - Uzbek Muqaddas Kitob bible

Ayub 38

¹Shundan keyin Egamiz quyun orasidan Ayubga shunday deb aytdi:

²“Bilmay turib gapirayotgan kim? Kim donoligimga gumon qilyapti?

³Qani, erkakka oʻxshab belingni bogʻla, Seni soʻroq qilaman, javob ber — chi.

⁴Zaminning poydevorini qoʻyganimda qayerda eding? Dono ekansan, qani ayt — chi!

⁵Yer yuzining sarhadlarini belgilagan kim? Axir, oʻzing bilasan — ku! Kim yerning ustidan chiziq oʻtkazdi?

⁶Yerning poydevorini nima ushlab turibdi?[96] Tong yulduzlari joʻr boʻlib, qoʻshiq kuylaganda, Ilohiy zotlar[97] quvonchdan hayqirganda Yerning tamal toshini[98] qoʻygan kim?

⁸Dengiz yer tubidan otilib chiqqanda, Darvozalarni yopib, toʻsib qoʻygan kim?[99]

⁹Axir, Men bulutlarni dengizga kiyim qilib qoʻydim. Dengizni qalin zulmat bilan oʻrab qoʻygan Menman.

¹⁰Men dengizga chegaralar belgiladim, Dengizni tambalangan darvozalar bilan toʻsib qoʻydim.

¹¹Men dengizga: «Faqat mana shu yergacha kelasan, Sening magʻrur toʻlqinlaring shu yerda toʻxtaydi», deb aytdim.

¹²Sen umringda biror marta, tong otsin, deb buyurganmisan? Yoki, sharqdan kun chiqsin, deb aytganmisan?

¹³Quyosh nuriga: «Yerning toʻrt burchiga tarqalib, Fosiqlarni yashiringan joyidan siltab chiqargin», deb aytganmisan?

¹⁴Kun yorishar ekan, matodagi bezaklar kabi Muhr bosilgan mum kabi Yer yuzidagi qirlaru vodiylar oʻz shaklini koʻrsatadi.

¹⁵Fosiqlarga nur berilmaydi, Ularning yomon niyatda koʻtarilgan qoʻli sinadi.

¹⁶Dengiz tubidagi buloqlarni borib koʻrganmisan? Suvlar tubida yurib, tekshirib koʻrganmisan?

¹⁷Oʻlim darvozalari qayerdaligini bilasanmi? Zulmat darvozalarini senga koʻrsatishganmi?

¹⁸Bu dunyoning qanchalik ulkanligini bilasanmi? Agar shularning hammasini bilsang, Menga ayt — chi!

¹⁹Yorugʻlikning maskaniga olib boradigan yoʻlni, Zulmatning turar joyini bilasanmi?

²⁰Ularni oʻz joylariga olib bora olasanmi? Oʻsha joyga qanday borishni bilasanmi?

²¹Ha, sen bilasan albatta! Sen yorugʻlik va zulmatdan oldin tugʻilgansan — da! Qanchalik uzoq umr koʻryapsan — a!

²²Qor saqlanadigan omborxonalarni koʻrganmisan? Doʻl saqlanadigan omborlarni — chi?

²³Men ularni kulfat kunlari uchun, Urush va jang kunlari uchun saqlab qoʻyganman.

²⁴Yorugʻlik manbaiga olib boradigan yoʻl qani? Sharq shamoli chiqadigan joy qayerda?

²⁵Selu jalaga kim yoʻl ochib bergan? Chaqmoqning yoʻllarini kim belgilagan?

²⁶Huvullab yotgan biyobonga, Kimsasiz choʻlga kim yomgʻir yogʻdiradi?

²⁷Tashlandiq xarobazorlarni suvga qondirib, U yerlarda maysalar oʻstiradigan kim?

²⁸Yomgʻirning otasi bormi? Shabnamni kim dunyoga keltirgan?

²⁹Muz qayerdan tugʻiladi? Samodan tushadigan qirovga kim hayot bergan?

³⁰Suv toshlarday qotib qoladi, Dengiz sathi muzlaydi.

³¹Parvin yulduzlarini sen bogʻlab qoʻya olasanmi? Hulkar[100] yulduzini ushlab turgan arqonlarni yecha olasanmi?

³²Yulduz turkumlarini oʻz mavsumida joyiga boshlaysanmi? Katta ayiq va kichik ayiq burjidagi yulduzlarga yoʻl koʻrsata olasanmi?

³³Osmon qonunlarini bilasanmi? Sen oʻsha qonunlarni yer yuziga tatbiq qila olasanmi?

³⁴Bulutlarga qarab baqirib koʻrgin — chi, Qani, ustingga yomgʻir yogʻarmikan?

³⁵Sen chaqmoqni chaqtira olasanmi? U kelib, xizmatingizdaman, deydimi?

³⁶Kim yuraklarga donolik bergan? Kallaga aql — idrokni kim solib qoʻygan?[101]

³⁷Qani, bulutlarni sanashga kimning aqli yetadi? Yer qaqraganda, tuproq qotib, kesakka aylanganda Kim falak meshlarini agʻdarib, yomgʻir yogʻdira oladi?

³⁹Gʻorlarida yashirin yotgan, Inlarida kutib yotgan Sherning bolalarini toʻydira olasanmi, Ona sherga oʻlja topib bera olasanmi?

⁴¹Qargʻaning bolalari qorni ochib, daydib yurganda, Menga faryod qilganda ehtiyojlarini qondirgan kim, axir?