Read Uzbek Muqaddas Kitob Ayub 39 Bible Online

Ayub 39 - Uzbek Muqaddas Kitob bible

Ayub 39

¹Togʻ echkilari qachon tugʻishini bilasanmi? Kiyiklar bolalaganini koʻrganmisan?

²Ular bolasini necha oy qornida koʻtarib yurishini bilasanmi? Ular bolalaydigan vaqtni — chi?

³Ular choʻkkalab tugʻadi, Bolalarini dunyoga keltiradi.

⁴Ularning bolalari ochiq joylarda oʻsib, kuchga toʻladi, Ota — onasini tashlab ketadi, boshqa qaytib kelmaydi.

⁵Qulonga kim ozodlik bergan? Kim uning arqonini yechib tashlagan?

⁶Men dashtlarni unga makon qilib berdim, Shoʻr yerlar qulonning maskani boʻldi.

⁷Shahardagi shovqin — surondan u kuladi, Hech kim uning ustiga minib, unga baqirolmaydi.

⁸Qirlar qulonning yaylovidir, Oʻsha yerlarda u koʻkatlarni qidirib yuradi.

⁹Yovvoyi buqa senga xizmat qilishga rozi boʻladimi? Tunni sening ogʻilingda oʻtkazadimi?

¹⁰Arqon bilan uni omochga bogʻlay olasanmi? U yerlaringni agʻdarib beradimi?

¹¹Kuchi koʻp, deb unga ishona olasanmi? Hamma ogʻir ishlaringni unga topshirasanmi?

¹²U hosilingni yigʻib, Xirmonga olib kelishiga ishonasanmi?

¹³Tuyaqush qanotlarini sevinch bilan qoqaveradi, Ammo uning qanotu patlari laylaknikiga teng kelolmaydi[102].

¹⁴Tuyaqush tuxumlarini yerga qoʻyadi, Ularni qumda isitadi.

¹⁵Birov oyoqlari bilan tuxumlarini bosib ketishidan, Yovvoyi hayvon ularni ezib tashlashidan xavotirlanmaydi.

¹⁶Oʻz bolalariga begonalarga oʻxshab berahm. Chekkan zahmati behuda, ammo unga baribir.

¹⁷Chunki Xudo unga aql bermagan, Uni idrokdan qisib qoʻygan.

¹⁸Ammo tuyaqush qanotlarini yoyib yugurganda[103], Otu chavandozni changida qoldirib ketadi.

¹⁹Otga kuchni sen berganmisan? Uning boʻynini sen yol bilan qoplaganmisan?

²⁰Sen otlarni chigirtkaday sakratasanmi?! Otlar baland ovoz bilan kishnab, Odamlarni qoʻrquvga soladi.

²¹Shiddat bilan yerni tepadi, Qattiq kuch bilan yugurib, jangga otiladi.

²²Qoʻrquvni bilmaydi, vahimaga tushmaydi, Qilichdan ham qochmaydi.

²³Ularning ustida oʻqdon taraqlaydi, Atrofida qilichu nayzalar yaltiraydi.

²⁴Burgʻular chalinganda otlar bir joyda turolmaydi, Ular chopqillab, yerni changitadi.

²⁵Har burgʻu chalinganda kishnaydi, Uzoqdanoq jang hidini sezadi. Sardorlarning jangga da’vatlariyu hayqiriqlarini eshitadi.

²⁶Qarchigʻaylar qanotlarini yoyib, janubga uchadi. Ularga uchishni sen oʻrgatdingmi?

²⁷Sen buyurganing uchun burgut parvoz qiladimi? Sening soʻzing bilan baland joylarda in quradimi?

²⁸U qoyalarda yashaydi, Qirrali qoyalar uning qal’asi.

²⁹Oʻsha yerdan turib, burgut oʻljasini topadi, Uzoqdan turib koʻzlari koʻradi.

³⁰Uning bolalari qonga toʻyadi, Jasadlar qayerda boʻlsa, ular ham oʻsha yerda.”

³¹Keyin Egamiz Ayubga shunday dedi:

³²“Qodir Xudo bilan bahslashayotgan odam endi Uni toʻgʻrilaydimi?! Qani, Xudoni ayblagan gapirsin endi!”

³³Shunda Ayub Egamizga javob berdi:

³⁴“Men senga javob berishga loyiq emasman, Damim ichimda, ogʻiz ochmayman.

³⁵Bir — ikki gapirib javob topmadim, Endi boshqa gapirmayman.”