Read Uzbek Muqaddas Kitob Ayub 4 Bible Online

Ayub 4 - Uzbek Muqaddas Kitob bible

Ayub 4

¹Shundan keyin Temonlik[13] Elifaz Ayubga shunday dedi:

²“Bir gap aytsam, xafa boʻlmaysanmi? Axir, kim gapirmay jim tura oladi?!

³Sen koʻplarga nasihat qilar eding. Ojizlarga yordam berar eding.

⁴Qoqilganlarga soʻzlaring bilan dalda berarding, Ogʻir yuk ostida ezilganlarga kuch bagʻishlarding.

⁵Endi esa azob — uqubatga uchraganingda tushkunlikka tushyapsan, Oʻz boshingga tushganlardan sarosimada oʻtiribsan.

⁶Xudodan qoʻrqishing umiding boʻlishi kerak emasmi?! Yoʻllaring toʻgʻriligi senga umid bagʻishlamaydimi?!

⁷Oʻylab koʻrgin — chi, qachon aybsiz inson halok boʻlgan?! Biror yerda solih kishi hech yoʻq qilinganmi?!

⁸Oʻz hayotimda koʻrganman, kim yovuzlik, Gʻam — gʻussa eksa, xuddi oʻshani oʻradi.

⁹Xudoning nafasi ularni oʻldiradi, Xudoning gʻazabidan fosiqlar daf boʻladi.

¹⁰Ularning shernikiday boʻlgan ovozlarini Xudo oʻchiradi, Oʻsha maxluqlarning tishlarini Xudo sindiradi.

¹¹Oʻlja yoʻqligidan u sherlar halok boʻladi, Shervachchalari ham uzoqlarga tarqalib ketadi.

¹²Menga bir soʻz yashirincha keldi, Qulogʻimga shivirlab eshitildi.

¹³Insonlar chuqur uyquda boʻlganda, Tashvishli tushlarda bu soʻz keldi.

¹⁴Meni qoʻrquv — qaltiroq bosdi, Butun vujudim larzaga keldi.

¹⁵Bir ruh yuzimni silab oʻtdi, Shunda tuklarim tikka boʻlib ketdi.

¹⁶Ruh toʻxtab, qimirlamay turdi, Ammo uni aniq koʻrmadim. Koʻz oldimda bir sharpa turar edi. Sukunat choʻkdi, keyin bir ovoz eshitdim:

¹⁷«Insonlar Xudoning oldida solih boʻla oladimi?! Odamlar Yaratuvchisining oldida pok boʻla oladimi?!

¹⁸Axir, Xudo hatto Oʻz farishtalariga ishonmaydi — ku, Ulardan ham ayb topadi — ku!

¹⁹Shunday ekan, tuproqdan yaratilgan insonlardan, Loydan bino boʻlgan, kuyaday eziladigan Odamlardan qanchalar ayb topadi?!

²⁰Axir, ular ertalab bor, Kechasi esa yoʻq boʻlib ketadigan insonlar — ku! Ularning nomi abadiy oʻchib ketadi.

²¹Chodirlarining arqonlari uzib tashlanadi, Ular donolikka yetishmay halok boʻladilar.»