Read Uzbek Muqaddas Kitob Ayub 40 Bible Online

Ayub 40 - Uzbek Muqaddas Kitob bible

Ayub 40

¹Shundan keyin Egamiz quyun orasidan gapirib, Ayubga shunday dedi:

²“Qani, erkakka oʻxshab belingni bogʻla, Seni soʻroq qilaman, javob ber — chi.

³Sen Meni adolatsizlikda ayblamoqchimisan? Meni hukm qilib, oʻzingni oqlamoqchimisan?

⁴Sening qoʻling Xudoning qoʻliday qudratlimi? Uning ovoziga oʻxshab gumburlaydigan ovozing bormi?

⁵Shunday boʻlsa, qani, oʻzingni shonli dabdabaga oʻragin — chi, Ulugʻvorlik va salobat bilan burkangin — chi.

⁶Gʻazabingni toʻkib soch, Hamma takabbur insonlarga nazar solgin — da, Ularning popugini pasaytirib qoʻy.

⁷Ha, barcha magʻrur insonlarga qaragin — da, Ularni yer bilan bitta qil. Fosiqlarni turgan joyida ezib tashla.

⁸Hammasini tuproqqa koʻmib tashla, Ha, yuziga tuproq tortib, qabrni yop.

⁹Shunda Men senga tan beraman, Oʻz kuching bilan najot topa olarkansan, deyman.

¹⁰Begemotga[104] qaragin, Xuddi seni yaratganimday uni ham Men yaratganman, U hoʻkizga oʻxshab oʻt yeydi.

¹¹Uning belida kuchi koʻp, Qorin mushaklari kuchga toʻla.

¹²Dumi sadr daraxtiday kuchli, Son mushaklari juda ham baquvvat.

¹³Uning suyaklari bronzadan yasalgan novlarday, Qoʻl — oyoqlari temirday mustahkam.

¹⁴Men yaratgan jonivorlar orasida u eng ajoyibidir, Yaratganning Oʻzigina unga bas kela oladi.

¹⁵Yovvoyi hayvonlar oʻynab yuradigan qirlar Unga oziq beradi.

¹⁶U xalqoblardagi qamishlar orasida, Nilufar gullari tagida yotadi.

¹⁷U nilufar gullarining soyasida yotadi, Irmoq boʻyidagi tollar uni oʻrab oladi.

¹⁸Daryo joʻshib oqsa ham u qoʻrqmaydi, Iordan daryosining toʻlqinlari yuziga urilsa ham U bexavotir turaveradi.

¹⁹Birov uning koʻzlarini koʻr qilib, ushlay oladimi?![105] Ilmoq bilan burnini teshib tuta oladimi?!

²⁰Maxluq Levitanni[106] baliq singari, Ilmoq bilan ushlay olasanmi?! Tilini arqon bilan bogʻlay olasanmi?!

²¹Burnidan arqon oʻtkazib, Jagʻini ilmoq bilan tesha olasanmi?!

²²Oʻsha maxluq qayta — qayta sendan rahm — shafqat tilaydimi?! Xoʻsh, u senga mayin soʻzlar bilan gapiradimi?!

²³Sen bilan ahd tuzib, Bir umrga quling boʻlib qoladimi?

²⁴Qush bilan oʻynaganday u bilan oʻynay olasanmi? Yoki qizlaring uchun uni bogʻlab bera olasanmi?

²⁵Baliqchilar uning uchun savdolashadimi?! Savdogarlarga uni boʻlib beradimi?!

²⁶Uning terisini nayza bilan tesha olasanmi? Boshini baliqchilarning sanchqisi bilan yora olasanmi?

²⁷Agar unga qoʻl tekkizsang, Bir umrga pushaymon boʻlasan! Ikkinchi qoʻl tekkizmaydigan boʻlasan.