Read Uzbek Muqaddas Kitob Ayub 41 Bible Online

Ayub 41 - Uzbek Muqaddas Kitob bible

Ayub 41

¹Ha, maxluq Levitanni[107] ushlamoqchi boʻlganlar oʻzini oʻzi aldaydi, Uning koʻrinishi odamni dahshatga tushiradi.

²Uni qoʻzgʻatishga hech kimning yuragi dov bermaydi. Shunday ekan, kim Menga qarshi chiqa oladi?!

³Xoʻsh, kimdan qarzim borki, hisobini talab qilsa?! Axir, falak ostidagi hamma narsa Meniki — ku!

⁴Men Levitanning qoʻlu oyoqlari, Beqiyos kuchi va ajoyib tanasi haqida aytib beray.

⁵Kim uning terisini shila oladi? Zirhga oʻxshagan terisini kim teshishi mumkin?[108]

⁶Uning ogʻzini kim ochib koʻra oladi? Axir, uning tishlari qoʻrqinchli — ku!

⁷Uning beli qator tizilgan qalqonlardaydir[109], Ular bir — biriga yopishtirib mahkamlangan.

⁸Bir — biriga shunchalik yaqinki, Hatto orasidan havo ham oʻtolmaydi.

⁹Ular bir — biriga yopishgan, Birga mahkamlangan, ajratib boʻlmaydi.

¹⁰Levitan aksirganda uchqun chiqadi, Koʻzlari tong nuriga oʻxshab chaqnaydi.

¹¹Ogʻzidan alanga chiqadi, Olov uchqunlari otiladi.

¹²Yonayotgan qamish ustida qaynayotgan qozondan bugʻ chiqqanday, Uning ham burnidan tutun chiqadi.

¹³Uning nafasi koʻmirni yondiradi, Ogʻzidan alanga chiqadi.

¹⁴Boʻyni shu qadar baquvvatki, Koʻrganlar vahimaga tushadi.

¹⁵Eti qatlam — qatlam boʻlib, bir — biriga yopishib ketgan, Ular shunchalik qattiqki, qimirlatib boʻlmaydi.

¹⁶Yuragi toshday qattiq, Ha, tegirmon toshiday qattiq.

¹⁷Levitan qoʻzgʻalganda, kuchlilar ham qoʻrqadi, Levitan tashlanganda, ular gʻujanak boʻladi.

¹⁸Unga tekkan qilich, nayza, yoy oʻqiyu Xanjar hech ta’sir qilmaydi.

¹⁹Temir unga somon kabidir, Bronza esa chirigan yogʻoch kabidir.

²⁰Yoy oʻqi uni qochirolmaydi, Palaxmon toshi somonchalik ta’sir qilmaydi.

²¹Tayoq unga xashakday tuyuladi, Nayzalarning shuvullashidan u kuladi.

²²Qornidagi tangachalari sopol parchasiday oʻtkir, Loydan yursa, yerni yorib oʻtadi.

²³Levitan harakatlaridan dengiz qaynaydi, Chuqur suvlarni qaynagan moyday qiladi.

²⁴U suzgan joylarda yaltiragan iz qoladi, Dengiz oq sochlar bilan qoplanganga oʻxshaydi.

²⁵Yer yuzida unga teng keladigani yoʻq, Bu jonivorda qoʻrquv degan narsa yoʻq.

²⁶Barcha takabbur jonzotga u past nazar bilan qaraydi, Magʻrur yovvoyi hayvonlarning shohi Levitandir.”