Read Uzbek Muqaddas Kitob Ayub 42 Bible Online

Ayub 42 - Uzbek Muqaddas Kitob bible

Ayub 42

¹Shunda Ayub Egamizga javob berdi:

²“Ha, bilaman, Sen hamma narsani qila olasan. Sening rejalaringni hech kim buza olmaydi.

³«Bilmay turib, donoligimga gumon qilayotgan kim?» — deb soʻrading. Oʻsha menman. Oʻzim tushunmaydigan narsalar haqida ogʻiz ochdim. Aqlim yetmaydigan ajoyibotlar haqida gapirdim.

⁴Sen: «Qani quloq sol, Men gapiraman. Seni soʻroq qilaman, javob ber», — deding.

⁵Sen haqingda birovlardan eshitgandim, Ammo endi koʻzlarim bilan Seni koʻrib turibman.

⁶Shuning uchun endi aytganlarimni qaytib olaman, Boshimga tuprogʻu kul sochib[110], tavba qildim.”

⁷Ayubga gapirib boʻlgandan keyin, Egamiz Temonlik[111] Elifazga shunday dedi: “Sen va ikki doʻstingdan juda qattiq gʻazabdaman, chunki sen Men haqimda toʻgʻri soʻzlarni aytmading. Ayub esa toʻgʻri gapirdi.

⁸Endi yettita buqa va yettita qoʻchqor olib, Ayubning yoniga boringlar. Oʻsha yerda oʻz gunohlaringiz uchun Menga kuydiriladigan qurbonlik keltiringlar. Ayub sizlar uchun ibodat qiladi. Men uning ibodatlarini qabul qilaman, sizlarga ahmoqligingizga loyiq jazo bermayman. Sizlar Men haqimda toʻgʻri soʻzlarni gapirmadingiz. Ayub esa toʻgʻri gapirdi.”

⁹Shunday qilib, Temonlik Elifaz, Shuvaxlik Bildad va Namaxlik Zoʻfar borib, Egamizning aytganlarini qildilar. Egamiz Ayubning ibodatlarini qabul qildi.

¹⁰Ayub oʻz doʻstlari uchun ibodat qilgandan keyin, Egamiz uning boyligini qayta tikladi. Unga oldingidan ikki baravar koʻp baraka berdi.

¹¹Shunda Ayubning hamma aka — ukalari, opa — singillari, eski tanishlarining barchasi kelishdi. Uning uyida ziyofat qilishdi. Egamiz tomonidan yuborilgan kulfatlar uchun Ayubga hamdardlik bildirib, unga tasalli berishdi. Ularning har biri Ayubga bir boʻlak kumush[112] va tilla uzuk hadya qildi.

¹²Ayubning qolgan umri davomida Egamiz unga oldingidan ham koʻproq baraka berdi: bu davrda Ayubning oʻn toʻrt mingta qoʻylari, olti mingta tuyasi, ming juft hoʻkizi va mingta eshagi bor edi.

¹³Egamiz Ayubga yetti oʻgʻil va uch qiz ham berdi.

¹⁴Ayub birinchi qiziga Yamima, ikkinchisiga Kaziyo, uchinchisiga esa Xaranxappux deb ot qoʻydi.

¹⁵Butun yurtda Ayubning qizlariday goʻzal qizlar yoʻq edi. Ayub qizlariga ham aka — ukalari qatori meros berdi.

¹⁶Shundan keyin Ayub yana bir yuz qirq yil yashadi. Farzandlar koʻrdi, nabiralaru ularning farzandlarini ham koʻrdi, hammasi boʻlib toʻrt nasl koʻrdi.

¹⁷Shunday qilib, Ayub yoshini yashab, oshini oshab, uzoq umr koʻrib, olamdan oʻtdi.