Read Uzbek Muqaddas Kitob Ayub 5 Bible Online

Ayub 5 - Uzbek Muqaddas Kitob bible

Ayub 5

¹Qani, Ayub, hozir chaqirib koʻr — chi, Kim senga javob berar ekan? Qaysi farishta senga yordamga kelar ekan?

²Ranj — alam nodonni[14] halok qiladi, Hasad soddani oʻldiradi.

³Nodonlarning ildiz otib, koʻkarganini koʻrdim, Birdaniga ularning uylarini la’natladim.

⁴Ularning farzandlari xavfdan uzoq boʻlmaydi. Hukm paytida ularni ezadilar, Lekin hech kim ularni himoya qilmaydi.

⁵Nodonlar yetishtirgan hosilni och qolganlar yeb qoʻyadi, Hatto tikanlar bilan oʻralganlarini ham olib qoʻyadi. Nodonlarning boyligini chanqaganlar yutib yuboradi.

⁶Axir, qaygʻu yerdan unib chiqmaydi — ku, Gʻam — tashvish dalada oʻsmaydi — ku!

⁷Alangadan uchqun sakrab chiqqani kabi, Inson ham oʻzi uchun muammo keltirib chiqaradi.

⁸Men Xudoga intilgan boʻlar edim, Oʻz arzimni Xudoga aytgan boʻlardim.

⁹U shunday buyuk ishlar qiladiki, Ularga insonning aqli yetmaydi. Xudo koʻrsatgan moʻjizalarning son — sanogʻi yoʻq.

¹⁰U yer yuziga yomgʻir yogʻdiradi, Dalalarni sugʻoradi.

¹¹Xor boʻlganlarni koʻtaradi, Qaygʻuga toʻlganlarni shodlikka toʻldiradi.

¹²U ayyorlarning rejalarini puchga chiqaradi, Shunda ularning qoʻlidan hech narsa kelmaydi.

¹³U donolarni oʻzlarining ayyorligi orqali tutib oladi, Egrilarning niyatlarini puchga chiqaradi.

¹⁴Kunduz kuni ham ular zulmatda qolishadi, Yop — yorugʻ kunda ham paypaslanib yurishadi.

¹⁵Lekin Xudo faqirlarni egrilarning achchiq soʻzlaridan, Zolimlarning changalidan qutqaradi.

¹⁶Shu bois kambagʻallarning umidi bor, Nohaqlikning esa ogʻzi yopiladi.

¹⁷Xudoning pand — nasihatini olganlar qanday baxtlidir, Shuning uchun Qodir Xudoning tanbehini rad qilmagin.

¹⁸Xudo yaralaydi, ammo Oʻzi bogʻlab qoʻyadi. Xudo uradi, lekin yana Oʻzi shifo beradi.

¹⁹U seni olti gʻam — tashvishdan qutqaradi, Ha, yetti qaygʻu — alam senga yaqinlashmaydi.

²⁰Qurgʻoqchilik paytida Xudo seni oʻlimdan, Urush paytida esa qilichdan saqlaydi.

²¹Xudo seni zaharli tillardan himoya qiladi, Halokat kelganda sen qoʻrquvga tushib qolmaysan.

²²Vayronayu qurgʻoqchilik ustidan kuladigan boʻlasan, Yer yuzidagi yovvoyi hayvonlardan qoʻrqmaydigan boʻlasan.

²³Yer haydaganingda dalangda toshlar boʻlmaydi, Yovvoyi hayvonlar senga hujum qilmaydi.

²⁴Uying bexatar ekanligini bilasan, Podalaringni tekshirganingda hammasi oʻz joyida boʻladi.

²⁵Farzandlaring koʻp boʻladi, Avloding daladagi maysaday koʻpayadi.

²⁶Sen bevaqt qabrga kirmaysan, Oʻz vaqtida yigʻilgan bugʻdoy doniday boʻlasan.

²⁷Bularning hammasi toʻgʻri, Oʻz tajribamizdan bilamiz. Endi nasihatlarimizga quloq sol, Ularni qabul qil.”