Read Uzbek Muqaddas Kitob Ayub 6 Bible Online

Ayub 6 - Uzbek Muqaddas Kitob bible

Ayub 6

¹Shundan keyin Ayub yana gapirdi:

²“Qani endi, qaygʻularimni oʻlchashning iloji boʻlsa edi, Mening kulfatlarim tarozida tortib koʻrilsa edi.

³Ular dengiz qumlaridan ham ogʻirroq chiqqan boʻlar edi. Shuning uchun ham boʻlar — boʻlmas gaplar aytdim.

⁴Qodir Xudo otgan nayzalar[15] tanamdadir, Ruhim ularning zahridan ichmoqda. Xudoning barcha dahshatlari menga qarshi tayyorlangan.

⁵Asov eshak oʻt yoʻqligida hangraydi — ku! Hoʻkiz ham oxurida yem boʻlmasa boʻkiradi — ku!

⁶Tuzsiz ovqatni yeb boʻlmaydi — ku! Pishirilmagan tuxum oqi axir, naqadar bemaza!

⁷Ularni koʻrib ishtaham yoʻqoladi. Ularni yeyishni oʻylasam koʻnglim ayniydi.

⁸Qani endi, tilagim bajo boʻlsa edi, Xudo niyatimni bajo keltirsa edi!

⁹Qani endi, Xudo meni ezib tashlashga rozi boʻlsa edi, Qoʻliga erk berib, jonimni olsa edi.

¹⁰Ana oʻshanda men tasalli topgan boʻlardim, Hatto ogʻriqlarimga qaramay quvongan boʻlardim, Chunki Muqaddas Xudoning soʻzlarini men rad qilganim yoʻq.

¹¹Qachongacha kutaman axir, kuchim yetarmikan?! Oxiri nima boʻladi oʻzi? Nima uchun sabr — toqat qilishim kerak?!

¹²Men toshday qattiq emasman — ku! Mening tanam temirdan emas — ku!

¹³Yoʻq, oʻzimga oʻzim yordam berolmayman, Hech bir chora — ilojim yoʻq.

¹⁴Qaygʻu — alam tortayotgan inson Qodir Xudodan qoʻrqishni rad qilgan boʻlsa ham, Oʻsha insonga sodiq doʻstlar kerak[16].

¹⁵Ammo doʻstlarimga ham ishonib boʻlmaydi, Ular oqib oʻtib ketadigan irmoqlardaydir.

¹⁶Oʻsha irmoqlar muzu qor eriganda toshib oqadi,

¹⁷Issiq havoda esa ular qurib qoladi, Kun qiziganda gʻoyib boʻladi.

¹⁸Karvonlar bu irmoqlarni qidirib, Yoʻllaridan adashib ketadilar. Yurib — yurib, choʻlda halok boʻladilar.

¹⁹Temo yurtining karvonlari ham suv qidirib keladilar, Shava yurtidan[17] kelganlar ham suvga umid qiladilar.

²⁰Ammo oʻsha irmoqlarga ishonganlar tushkunlikka tushadilar, U yerga borib, gangib qoladilar.

²¹Sizlar ham men uchun xuddi oʻsha irmoqlardaysizlar. Kulfatimni koʻrib turib, vahimaga tushyapsizlar.

²²Sizlardan biron narsa soʻradimmi?! Yoki boyligingizdan berib, meni qutqaringlar, deb aytdimmi?!

²³Dushmanlarimning qoʻlidan qutqaringlar, dedimmi?! Yoki zoʻravonlardan meni xalos qilinglar, deb soʻradimmi?!

²⁴Menga oʻrgatinglar, mayli jim turaman. Qanday notoʻgʻri ish qilganimni tushuntirib beringlar.

²⁵Haqiqat soʻzlari naqadar achchiq! Lekin gaplaringiz nimani isbotlayapti?

²⁶Meni behuda gaplarni aytyapti, deb oʻylaysiz. Shunday ekan, nimaga tushkunlikda aytganlarimga javob qaytarasiz?!

²⁷Sizlar hatto yetimlar uchun qur’a tashlagan boʻlardingiz. Doʻstingiz ustidan savdolashib, uni sotgan boʻlardingiz.

²⁸Endi marhamat qilib menga qaranglar, Men sizlarga yolgʻon gapirmayman.

²⁹Bas endi, nohaqlik qilmang. Axir, mening aybim yoʻq — ku!

³⁰Yo gapimda biror nohaqlik bormi? Tilim yovuzlikning ta’mini ajrata bilmaydimi?!