Read Uzbek Muqaddas Kitob Ayub 7 Bible Online

Ayub 7 - Uzbek Muqaddas Kitob bible

Ayub 7

¹Insonning yerdagi mehnati mashaqqatli — ku! Uning kunlari mardikorning kuniga oʻxshaydi — ku!

²Ha, inson soyani qoʻmsagan qulga oʻxshaydi! Oʻz haqini kutgan mardikordaydir u!

³Menga ham maqsadsiz oylar, Qaygʻuga toʻla tunlar berilgan.

⁴Yotganimda: «Qachon tong otarkan?» — deyman, Lekin tun juda choʻzilib ketadi, Tong otguncha agʻnab chiqaman.

⁵Tanamni qurt va yara bosib ketgan, Terim yorilib, yiringlab ketgan.

⁶Kunlarim boʻzchining mokisidan[18] ham tezroq oʻtadi, Aslo umid bagʻishlamay oʻtib ketaveradi.

⁷Ey Xudoyim, hayotim bir nafasday ekanligini yodingda tut, Koʻzlarim endi hech qachon yaxshilikni koʻrmaydi.

⁸Hozir meni koʻrib turibsan, lekin bu uzoqqa choʻzilmas, Meni qidirasan, lekin men oʻshanda boʻlmayman.

⁹Bulut tarqalib, yoʻq boʻlib ketadi. Xuddi shunga oʻxshab, oʻliklar diyoriga[19] ketganlar qaytib kelmaydi.

¹⁰Ular uylariga qaytib kelmaydilar, Oʻz yashagan joylarida ularni bilmaydilar.

¹¹Shuning uchun jim boʻlmay, Oʻz dardimni bayon qilaman, Alam — hasratda shikoyat qilaman.

¹²Ey Xudoyim! Nima uchun ustimdan qoʻriqchi qoʻyding? Men dengizmanmi yoki dengiz maxluqimanmi?[20]

¹³«Toʻshagim menga tasalli berar, Uyqu dardimni yengillashtirar», — desam,

¹⁴Tushlar orqali meni qoʻrqitasan, Vahiylar orqali dahshatga solasan.

¹⁵Shunda men, qani endi boʻgʻilib qoʻya qolsam, deyman, Axir, shu jismimda yashashdan koʻra, oʻlim afzalroq.

¹⁶Hayotimdan nafratlanyapman, abadiy yashamayman. Hayotim bir nafasday boʻlsa oʻzi, meni tinch qoʻygin, axir!

¹⁷Inson kim boʻlibdiki, Unga shunchalik e’tibor bersang?! Odam kim boʻlibdiki, U haqda oʻylasang?!

¹⁸Har tong uni tekshirib, Har lahzada sinasang?!

¹⁹Bir lahzaga mendan yuz oʻgirgin, Tinch qoʻygin, hech boʻlmasa bir yutinay.

²⁰Gunoh qilgan boʻlsam, Senga nima, ey odamzod Qoʻriqchisi?! Nima uchun meni Oʻzingga nishon qilib olding?! Sening menda qasding bormi?![21]

²¹Nima uchun gunohimni kechirib, Aybimdan forigʻ qilmaysan? Axir, yaqinda tuproqqa qaytaman — ku! Meni qidirganingda esa yoʻq boʻlib ketgan boʻlaman.”