Read Uzbek Muqaddas Kitob Ayub 8 Bible Online

Ayub 8 - Uzbek Muqaddas Kitob bible

Ayub 8

¹Shuvaxlik[22] Bildad Ayubga shunday dedi:

²“Qachongacha shunday gaplarni gapirasan? Ogʻzingdan chiqqan soʻzlar shamolga oʻxshaydi — ya!

³Xudo adolatga xiyonat qiladimi? Qodir Xudo haqiqatning yoʻlini toʻsadimi?

⁴Farzandlaring Unga qarshi gunoh qilgan boʻlsa, Xudo ularni gunohlari uchun jazoladi.

⁵Xudoga yuz burgin, Qodir Xudoga yolvorgin.

⁶Agar pok va solih boʻlsang, Albatta U senga qoʻlini uzatib, Seni oʻz haqqoniy joyingga qaytaradi.

⁷Oxiri shunchalik farovon boʻlasanki, Avvalgi holating nochorday tuyuladi.

⁸Ana, oʻtib ketganlarga qaragin, Ajdodlarimizning qilganlariga e’tibor bergin.

⁹Axir, biz kechagina tugʻilganmiz, hech narsa bilmaymiz, Hayotimiz ham soyadek oʻtib ketadi.

¹⁰Ajdodlarimiz senga muallim boʻladi, Ularning aql — zakovatidan saboq ol.

¹¹Toʻqayzor boʻlmasa qamish oʻsadimi?! Suv boʻlmagan joyda qamish boʻy choʻzadimi?!

¹²Qamishlar hali koʻkarib turgan paytdayoq, Kesilishga tayyor boʻlmay turib, Hamma oʻtlardan oldin soʻlib qoladi.

¹³Ha, Xudoni unutganlar ham shu koʻyga tushadi, Betavfiqlarning umidi puchga chiqadi.

¹⁴Ular umid bogʻlagan narsalar juda moʻrtdir, Ular ishongan narsalar oʻrgimchakning toʻrlaridaydir.

¹⁵Ular oʻz uyiga suyanadilar, ammo uy buzilib ketadi. Uyini mahkam ushlaydilar, lekin uy bardosh bermaydi.

¹⁶Fosiqlar yaxshi sugʻorilgan, Quyosh nuri ostida oʻsayotgan butaga oʻxshaydilar, Novdalari butun bogʻ boʻylab yoyilib ketgan.

¹⁷Ildizlari toshlarga chirmashib, Oʻsha yerdan oʻziga joy qidiradi.

¹⁸Lekin ildiz yulib tashlanganda, Oʻsgan joyi ham bilinmaydi.

¹⁹Ha, fosiqlarning shodligi uzoqqa choʻzilmaydi, Boshqalar chiqib, ularning oʻrnini oladi.

²⁰Aybsiz kishini Xudo hech rad qilmaydi, Yovuzlarga esa yordam qoʻlini uzatmaydi.

²¹U hali ogʻzingni kulgi bilan toʻldiradi, Lablaringdan esa shodlik sadosini yangratadi.

²²Sendan nafratlanganlar uyatga qoladilar, Fosiqlarning chodiri vayron boʻladi.”