Read Uzbek Muqaddas Kitob Zabur 102 Bible Online

Zabur 102 - Uzbek Muqaddas Kitob bible

Zabur 102

¹Dovud sanosi. Egamizni olqishlagin, ey jonim, Uning muqaddas nomini olqishla, ey vujudim!

²Egamizni olqishlagin, ey jonim, Uning qilgan hamma yaxshiliklarini unutmagin!

³Hamma gunohlarimni U kechiradi, Barcha xastaliklarimga U shifo beradi.

⁴Meni qabrdan U qutqaradi, Sevgi, shafqat ila menga toj kiygizadi.

⁵Hayotimni[276] ne’mat ila U qondiradi, Yoshligim burgutning kuchiday yangilanadi.

⁶Egamiz toʻgʻri ish qiladi, Mazlumlarga adolat qiladi.

⁷Oʻz yoʻllarini U Musoga ma’lum qilgan, Ishlarini Isroil xalqiga namoyon etgan.

⁸Egamiz rahmdil, inoyatlidir, Jahli tez chiqmaydi, sodiq sevgisi moʻldir.

⁹U doimo bizni ayblamaydi, Yoki to abad gʻazabini sochmaydi.

¹⁰Bizni U gunohlarimizga qarab jazolamas, Yomonliklarimizga qarab qaytarmas.

¹¹Samolar zamindan naqadar balanddir! Egamizning sodiq sevgisi ham Undan qoʻrqqanlarga shunday yuksakdir!

¹²Sharq gʻarbdan qanchalik uzoq boʻlsa, Gunohlarimizni bizdan shu qadar uzoq qiladi.

¹³Ota bolalariga shafqat qilganday, Egamiz Oʻzidan qoʻrqqanlarga rahm qiladi.

¹⁴Biz qanday yasalganimizni U biladi, Biz tuproq ekanimizni[277] U yodida tutadi.

¹⁵Insonmiz, maysaga oʻxshar umrimiz, Dasht guliga oʻxshab gullaymiz.

¹⁶Shamol esar, maysa yoʻq boʻlar, Uni oʻz joyi eslamay qoʻyar.

¹⁷Ammo Egamizning sodiq sevgisi Abadulabad Undan qoʻrqqanlar bilan birgadir! Uning sodiqligi esa ularning nasliga oʻtadi.

¹⁸Ha, Egamiz sodiq qoladi Uning ahdiga rioya qilganlarga, Uning amrlariga sadoqat ila itoat etganlarga.

¹⁹Egamiz taxtini oʻrnatgandir samoda, Uning shohligi hukmrondir hamma yerda.

²⁰Egamizni olqishlang, ey Uning farishtalari, Uning amrini ijro qiluvchi bahodirlar, Uning soʻzlariga itoat etuvchilar!

²¹Ey Egamizning samoviy lashkarlari! Uning irodasini ijro etuvchi xizmatkorlari! Egamizni olqishlang!

²²Ey Egamiz yaratganlarning hammasi! U hukmron boʻlgan har bir joyda Uni olqishlanglar! Ey jonim! Egamizni olqishla!