Read Uzbek Muqaddas Kitob Zabur 104 Bible Online

Zabur 104 - Uzbek Muqaddas Kitob bible

Zabur 104

¹Egamizga shukur ayting, Unga sajda qiling, Boshqa xalqlar orasida Uning ishlarini bildiring.

²Tarannum qilib Uni, hamdu sano ila qoʻshiq ayting, Uning jamiki ajoyib ishlarini soʻzlab bering.

³Egamizning muqaddas nomi ila faxrlaning, Egamizga yuz burganlarning qalbi shodlikka toʻlsin.

⁴Qudratli Egamizga yuz buring! Uning huzurida boʻlishga intiling.

⁵Ey sizlar, Egamizning quli Ibrohim nasli, Ey Yoqub oʻgʻillari — Egamizning tanlaganlari, Egamiz qilgan ajoyibotlarini esda tuting, Uning moʻjizalarini, chiqargan hukmlarini unutmang.

⁷U Egamiz Xudodir, U butun yer yuzini adolatli hukm qiladi.

⁸Oʻz ahdini U to abad yoddan chiqarmas, Minglab nasllarga bergan va’dasini unutmas.

⁹Rioya qilar U Ibrohim bilan qilgan ahdiga, Is’hoqqa qasam ichib bergan va’dasiga.

¹⁰Yoqub uchun bu ahdni bir qonun qildi, Ha, Isroil uchun abadiy bir ahd qildi.

¹¹Aytdiki[283]: “Kan’on yurtini senga beraman, Uni oʻzingga abadiy mulk qilib olasan.”

¹²Oʻsha vaqtda ularning soni kam edi, Ha, juda kamchilik edilar. Ular bu yurtga kelgindi edi.

¹³Kezardi bir xalq orasidan boshqasiga, Bir shohlikdan boshqa yurtga.

¹⁴Egamiz hech kimga ularni ezishlariga yoʻl qoʻymadi, Ularni deb shohlarga tanbeh berdi.

¹⁵Aytdiki: “Men tanlaganlarga tegmanglar, Paygʻambarlarimga[284] zarar keltirmanglar.”

¹⁶Kan’on yurti ustiga Egamiz ocharchilik yubordi, Bitta qoldirmay yeguliklarga qirgʻin keltirdi.

¹⁷Ulardan oldin odam yubordi, Ha, Yusuf[285] qul kabi sotildi.

¹⁸Uning oyoqlariga zanjir urildi, Boʻynidan temir halqa oʻtkazildi.

¹⁹Yusufning soʻzlari bajo boʻladigan vaqt kelguncha, Egamizning kalomi Yusufni sinadi.

²⁰Misr shohi odam yuborib, Yusufni qutqardi, Ellarning hukmdori uni ozod qildi.

²¹Yusufni shoh saroyining boshqaruvchisi qilib tayin etdi, Jamiki mulkining hokimi qildi.

²²Xohlasa saroydagi a’yonlarimni zanjirband qilsin[286], Maslahatchilarimga donolik ila oʻgit bersin deb, shunday qildi.

²³Soʻngra Isroil Misrga keldi, Ha, Yoqub nasli Xom yurtida[287] musofir boʻldi.

²⁴Uning xalqini Egamiz barakali qildi, Dushmanlariga qaraganda, koʻpaytirdi.

²⁵Egamiz Misr xalqining yuraklarini oʻzgartirdi, Ular Egamiz xalqidan nafratlandi, Egamizning qullariga qarshi ular fitna uyushtirdi.

²⁶Soʻngra Egamiz quli Musoni yubordi, Tanlab olgan Horunni birga joʻnatdi.

²⁷Misrliklar orasida, oʻsha Xom yurtida Ikkalasi Egamizning moʻjizalarini, ajoyibotlarini koʻrsatdi[288].

²⁸Egamiz zulmat yubordi, Misrni zulmatga burkadi, Axir, Misrliklar Egamizning amrlariga itoatsizlik qildi[289].

²⁹Misrning suvlarini Egamiz qonga aylantirdi, Jamiki baliqlarini nobud qilib tashladi.

³⁰Misr yurti toʻlib ketdi qurbaqalarga, Yetib bordi hatto hukmdorlarning uyiga.

³¹Egamiz amr berganda, soʻnalar galasi keldi, Misr boʻylab burgalar qaynab ketdi.

³²Yomgʻir oʻrniga ularga Egamiz doʻl yogʻdirdi, Butun Misr boʻylab chaqmoq chaqtirdi.

³³Uzumzoru anjirzorlarini quritdi, Misrdagi daraxtlarni qoʻporib tashladi.

³⁴Egamiz amr berganda, chigirtkalar[290] keldi, Son — sanoqsiz mayda chigirtkalar chiqib keldi.

³⁵Ular Misrdagi butun oʻt — oʻlanni yeb yubordi, Misr oʻlkasidagi hosilni yeb bitirdi.

³⁶Misrdagi jamiki toʻngʻich oʻgʻillarni Egamiz nobud qildi, Ha, ularning faxri, qut — baraka timsolini yoʻq qildi.

³⁷Soʻng Egamiz Oʻz xalqini Oltinu kumushga boyitib[291] olib chiqdi. Isroil qabilalarining orasida qoqilib qolgani boʻlmadi.

³⁸Misrliklar Isroildan qoʻrqib, vahimaga tushgandi, Ular ketgach, Misr xalqi sevindi.

³⁹Xalqi ustida yopinchiq boʻlsin deb, Egamiz bulutni yoydi, Kechasi yorugʻlik boʻlsin deb, alanga berdi[292].

⁴⁰Isroil goʻsht soʻraganda Egamiz bedanalar berdi, Osmondan non yogʻdirib, ularni toʻygʻazdi[293].

⁴¹Egamiz qoyani ochdi, suv otilib chiqdi[294], Sahro boʻylab daryoday suv oqdi.

⁴²Egamiz Oʻzining muqaddas va’dasini, Oʻz quli Ibrohimga bergan va’dasini yodda tutdi.

⁴³Shu bois xalqini olib chiqdi sevinch ila, Oʻz tanlaganlarini shodlik hayqiriqlari ila.

⁴⁴Begona xalqlarning yurtlarini ularga berdi, Oʻsha xalqlarning boyligini Isroil mulk qilib oldi.

⁴⁵“Isroil xalqi Mening farmonimga rioya qilsin, Mening qonunlarimga itoat etsin”, deya Egamiz mana shularning hammasini qildi. Egamizga hamdu sanolar boʻlsin!