Read Uzbek Muqaddas Kitob Zabur 105 Bible Online

Zabur 105 - Uzbek Muqaddas Kitob bible

Zabur 105

¹Egamizga hamdu sanolar boʻlsin! Egamizga shukrona ayting, U yaxshidir! Uning sodiq sevgisi abadiydir.

²Egamizning qudratli ishlarini kim batafsil ayta oladi?! Kim Unga mukammal hamdu sano ayta oladi?!

³Baxtlidir adolat ila ish tutganlar, Har doim toʻgʻri ish qilganlar.

⁴Ey Egam, xalqingga muruvvat koʻrsatganingda meni eslagin, Ularga najot berganingda, menga ham yordam bergin,

⁵Toki tanlagan xalqingning iqbolini koʻrayin, Xalqingning shodligini koʻrib, men ham quvonayin, Ular bilan birga faxrlanib yurayin.

⁶Ey Isroil xalqi, ota — bobolarimiz kabi, biz gunoh qildik, Egri yoʻldan yurdik, yomonlik qildik.

⁷Ota — bobolarimiz Misrda boʻlganlarida, Egamizning ajoyib ishlariga e’tibor qilmadilar, Uning moʻl sodiq sevgisini eslamadilar, Qizil dengizda[295] isyon qildilar.

⁸Qudratli kuchini bildirish uchun, Oʻz nomi haqi, Egamiz ularni qutqardi.

⁹U Qizil dengizga doʻq urdi, dengiz quridi. Qup — quruq yerdan yetaklaganday, Isroil xalqini dengiz tubidan oʻtkazdi[296].

¹⁰Egamiz ularni yov qoʻlidan qutqardi, Gʻanim qoʻlidan ularni ozod qildi.

¹¹Suvlar qaytib, gʻanimlarni bosib qoldi, Dushmanlarning birontasi qutula olmadi.

¹²Shunda Isroil xalqi Egamizning soʻziga ishondi, Unga hamdu sanolar kuyladi.

¹³Ular tez orada Egamizning ishlarini unutdi, Egamizdan bemaslahat ish qildilar.

¹⁴Sahroda ular nafsi buzuqlik qildi, Dashtu biyobonda ular Xudoni sinadi[297].

¹⁵Egamiz ularga soʻraganini berdi — yu, Ularga halokatli xastalikni ham yubordi.

¹⁶Qarorgohdagi xalq Musoga, Egamizga bagʻishlangan Horunga hasad qildi[298].

¹⁷Yer yorilib, Datanni yutib yubordi, Aburam bilan sheriklarini yamlab yubordi.

¹⁸Sheriklari ustiga olov tushdi, Oʻsha fosiqlarni alanga yondirdi.

¹⁹Sinay togʻida[299] ular buzoq yasadilar, Oʻsha oltin butga sajda qildilar[300].

²⁰Ular Xudoning ulugʻvorligini Oʻt yeydigan buqa tasviriga alishdilar.

²¹Misrda buyuk ishlar qilgan Najotkori Xudoni unutdilar.

²²Xom yurtida[301] Egamiz ajoyibotlar koʻrsatgandi, Qizil dengizda qoʻrqinchli ishlar qilgandi. Ana shularni Isroil xalqi unutdi.

²³Shu bois Egamiz, ularni qiraman, dedi. Ammo Muso, Egamizning tanlagani oʻrtaga tushib, Egamizdan iltijo qilib, Uni qahru gʻazabidan qaytardi.

²⁴Soʻngra ular maftunkor yurtni xor qildilar, Egamizning va’dasiga ishonmadilar[302].

²⁵Oʻz chodirlarida mingʻirlab nolidilar, Egamizga itoat etmadilar.

²⁶Egamiz qoʻlini koʻtarib, ont ichdi: “Sizlarni sahroda yakson qilaman.

²⁷Naslingizni xalqlar orasiga tarqataman, Boshqa yurtlarga ularni sochib yuboraman.”

²⁸Soʻngra bizning ota — bobolarimiz Piyor togʻidagi Baalga sajda qilishga qoʻshildilar[303], Oʻliklarga[304] keltirilgan qurbonlikdan yedilar.

²⁹Ular qilmishlari bilan Egamizni gʻazablantirdilar, Ular oʻlatga giriftor boʻldilar.

³⁰Finxaz qoʻzgʻalib, aralashdi, Shunda oʻlat ham toʻxtadi.

³¹Shu bois Finxaz solihlik timsoli boʻldi, Bu nasllardan nasllarga to abad davom etadi.

³²Mariva suvlari boʻyida[305] ular Egamizning qahrini keltirdilar, Ularning dastidan Musoning boshiga qaygʻular keldi.

³³Ular Musoning gʻazabini qoʻzgʻatdi, Muso ham oʻylamay gapirdi.

³⁴Egamiz, xalqlarni qiringlar, deb amr bergandi, Ular Egamizning amrini bajarmadi.

³⁵Begona xalqlar bilan ular aralashib, Ularning odatlarini oʻrgandilar.

³⁶Ular begona xalqlarning butlariga sajda qildilar, Oʻsha butlar Egamizning xalqiga tuzoq boʻldi.

³⁷Ular oʻzlarining oʻgʻil — qizlarini Jinlarga qurbon qildilar.

³⁸Ha, oʻzlarining oʻgʻil — qizlarini Kan’on butlariga qurbon qilib, Begunoh qon toʻkdilar. Ularning qoni yurtni harom qildi.

³⁹Ishlari bilan oʻzlarini bulgʻadilar, Qilmishlari bilan Egamizga bevafolik qildilar.

⁴⁰Shunda Egamiz Oʻz xalqidan gʻazablandi, Ulardan jirkandi.

⁴¹Ularni yot xalqlarning qoʻliga berdi, Gʻanimlari ular ustidan hukmron boʻldi.

⁴²Dushmanlari ularni siquvga oldi, Kuch bilan ularni boʻyin egdirdi.

⁴³Koʻp marta Egamiz ularni qutqardi, Ular esa ataylab isyon qilgan edi, Gunohlari tufayli past ketdilar.

⁴⁴Shunda ham Egamiz Oʻz xalqining nolalarini eshitib, Ularning kulfatlariga e’tibor berdi.

⁴⁵Ular haqi Oʻz ahdini yodida tutdi, Moʻl sodiq sevgisi bilan ularga shafqat koʻrsatdi.

⁴⁶Ularni asir olganlarni Shafqatli boʻlishga undadi.

⁴⁷Ey Egamiz Xudo, bizlarni qutqar, Xalqlar orasidan bizni toʻplab ol, Oʻzing muqaddassan, Senga shukur aytaylik, Madhga loyiq ishlaring bilan faxrlanaylik.

⁴⁸Isroil xalqining Xudosi — Egamizga To abad olqishlar boʻlsin, Jamiki xalqlar: “Omin”, deb aytsin. Egamizga hamdu sanolar boʻlsin!