Read Uzbek Muqaddas Kitob Zabur 106 Bible Online

Zabur 106 - Uzbek Muqaddas Kitob bible

Zabur 106

¹Egamizga shukrona ayting, U yaxshidir, Uning sodiq sevgisi abadiydir.

²Shunday desin Egamizdan najot topganlar, U kulfatdan qutqargan odamlar.

³Axir, Egamiz ularni sharqu gʻarbdan, Shimolu janubdan[306] toʻplagan, Koʻp yurtlardan ularni yigʻib kelgan.

⁴Ba’zilari choʻlu biyobonda tentirab yurdilar, Yashash uchun biron shaharga yoʻl topmadilar.

⁵Och, tashna holda qoldilar, Sal boʻlmasa oʻlayozdilar.

⁶Kulfatda qolganlarida Egamizga nola qildilar, Egamiz ularni azob — uqubatlardan qutqardi.

⁷Ular yashaydigan shaharga borgunga qadar, Egamiz ularni toʻgʻri yoʻldan yetakladi.

⁸Sodiq sevgisi uchun ular Egamizga shukrona aytsin! Egamizning insoniyatga koʻrsatgan ajoyib ishlari uchun shukur qilsin!

⁹Zotan, U qondirar tashna boʻlganlarni, Toʻydirar ne’matlar bilan ochlarni.

¹⁰Ba’zilari zimziyo zulmatda oʻtirardilar, Asir boʻlib, kishanda azob chekardilar.

¹¹Ular Xudoning soʻzlariga qarshi isyon qilgandilar, Xudoyi Taoloning yoʻl — yoʻriqlarini mensimadilar.

¹²Shu bois Xudo ularni ogʻir ishlarga majbur etdi, Ular yiqilganda, yordam berishga biron kimsa boʻlmadi.

¹³Kulfatda qolganlarida Egamizga nola qildilar, Egamiz ularni azob — uqubatlardan qutqardi.

¹⁴Ularni zimziyo zulmatdan olib chiqdi, Ularning kishanlarini parcha — parcha qildi.

¹⁵Sodiq sevgisi uchun ular Egamizga shukrona aytsin! Egamizning insoniyatga koʻrsatgan ajoyib ishlari uchun shukur qilsin!

¹⁶Zotan, U bronza darvozalarni sindirar, Temir tambalarni ikkiga boʻlib tashlar.

¹⁷Ba’zilari ahmoq boʻlib, itoatsizlik qildilar, Gunohlari tufayli azobga duchor boʻldilar.

¹⁸Har qanday ovqatdan jirkanar edilar, Oʻlim ogʻziga yaqinlashib qolgan edilar.

¹⁹Kulfatda qolganlarida Egamizga nola qildilar, Egamiz ularni azob — uqubatlardan qutqardi.

²⁰Egamiz gapirib, ularga shifo berdi, Qabrdan ularni saqlab qoldi.

²¹Sodiq sevgisi uchun ular Egamizga shukrona aytsinlar! Egamizning insoniyatga koʻrsatgan ajoyib ishlari uchun shukur qilsinlar!

²²Ular shukrona qurbonligini keltirsinlar, Uning ishlarini shodon qoʻshiqlarda kuylasinlar.

²³Ba’zilari kemalarda dengizga chiqdilar, Vahimali suvlar uzra savdo qildilar.

²⁴Ular Egamizning ishlarini, Chuqur suvda Uning moʻjizalarini koʻrdilar.

²⁵U amr berganda, boʻron qoʻzgʻaldi, Dengiz toʻlqinlari baland koʻtarildi.

²⁶Kema osmonga koʻtarilib, yana chuqur suvga tushdi, Falokatdan kemadagilar bemajol boʻlib qoldi.

²⁷Ular mast kabi dovdirab aylandi, Mahoratlari foyda bermadi.

²⁸Kulfatda qolganlarida Egamizga nola qildilar, Egamiz ularni azob — uqubatlardan qutqardi.

²⁹U boʻronni shabadaga aylantirdi, Dengiz toʻlqinlari sukutga choʻmdi.

³⁰Toʻlqinlar jim boʻlganidan ular sevindi, Istagan bandargohga[307] ularni keltirib qoʻydi.

³¹Sodiq sevgisi uchun ular Egamizga shukrona aytsin! Egamizning insoniyatga koʻrsatgan ajoyib ishlari uchun shukur qilsin!

³²Ular jamoa oldida Egamizni ulugʻlasin, Oqsoqollar yigʻinida Unga hamdu sanolar aytsin.

³³Egamiz daryolarni sahroga aylantirar, Buloqlarni qaqragan yerga aylantirar.

³⁴Aholisining fosiqligi sababli Hosildor yerlarni shoʻr yerga aylantirar.

³⁵Sahroni esa Egamiz koʻl qilar, Qaqragan yerdan buloqlar chiqarar.

³⁶Och — yupunlarni u yerga olib kelib oʻrnashtirar. Ular esa yashash uchun shaharlar qurar.

³⁷Dalalarga urugʻ ekib, uzumzorlar yaratar, Dalalardan moʻl — koʻl hosil olar.

³⁸Egamizning barakasi ila ular juda koʻpayar, Ularning chorvasi kamayishiga Egamiz yoʻl qoʻymas.

³⁹Egamiz aslzodalarni xor qildi, Yoʻlsiz sahroda ularni sargardon qildi. Zulm, kulfat, gʻamdan Ularning soni kamaydi, Ular qashshoqlashdi.

⁴¹Yoʻqsillarni esa Egamiz kulfatdan qutqarar, Ularning oilasini qoʻy suruviday koʻpaytirar.

⁴²Solihlar buni koʻrib, sevinar, Fosiqlar esa ogʻzini yopib, jim boʻlar.

⁴³Donolar bularga e’tibor bersin, Egamizning sodiq sevgisini anglasin.