Read Uzbek Muqaddas Kitob Zabur 108 Bible Online

Zabur 108 - Uzbek Muqaddas Kitob bible

Zabur 108

¹Ijrochilar rahbariga. Dovud sanosi. Seni olqishlayman, ey Xudo, Sukut saqlamagin.

²Fosiq, yolgʻonchilar menga qarshi ogʻiz ochgan, Yolgʻonchi tillar bilan menga qarshi gapirar.

³Nafratga toʻla soʻzlarni ustimga yogʻdirarlar, Sababsiz menga hujum qilarlar.

⁴Menga ayb qoʻyarlar doʻstligimga javoban, Ibodat qilaman hamon.

⁵Yaxshilik evaziga menga yomonlik qaytararlar, Doʻstligim evaziga menga adovat qilarlar.

⁶Fosiqni ularga qarshi qoʻy, Ularning oʻng tomonida ayblovchi tursin.

⁷Sinalganda, ular aybdor boʻlsin, Ularning ibodati gunoh deb hisoblansin.

⁸Ularning umri qisqa boʻlsin, Oʻrnini boshqasi olsin.

⁹Yetim boʻlib qolsin bolalari, Beva boʻlib qolsin xotinlari.

¹⁰Bolalari kulbasidan ayrilib, darbadar boʻlsin, Non izlab tilanchi boʻlsin.

¹¹Mol — holini sudxoʻrlar egallasin, Mehnati samarasini begonalar tortib olsin.

¹²Biron kimsa ularga shafqat qilmasin, Ularning yetim bolalariga hech kim achinmasin.

¹³Ularning nasl — nasabi qirilib ketsin, Bir nasldan soʻng nomlari yoʻq boʻlsin.

¹⁴Ey Egamiz! Otalari aybini esga olgin, Onalarining gunohini hech qachon unutmagin.

¹⁵Ey Egamiz, ularning gunohidan doim xabardor boʻlgin, Oʻsha insonlarning xotirasini yer yuzidan oʻchirgin.

¹⁶Axir, ular hech qachon shafqat qilishni oʻylamadi. Muhtojlarni, umidsizlikka tushganlarni, Kambagʻallarni ta’qib qildi, oʻldirdi.

¹⁷Ular la’natlashni yaxshi koʻrardi, Endi la’natlari oʻzlarining boshiga kelsin. Duo qilishni yoqtirmasdi, Endi duo ulardan uzoq boʻlsin[316].

¹⁸La’natni ular kiyimday kiyardi, Ularning tanasiga la’nat suv kabi kirardi, Suyaklariga moy kabi singardi.

¹⁹Ha, kiyim kiyganday, ular la’natga oʻranib olsin, La’natni har kuni belga taqadigan kamarday qilib olsin.

²⁰Ey Egam! Menga qarshi yomon gapiruvchilarga, Meni ayblovchilarga Sendan ana shular mukofot boʻlsin.

²¹Sen, ey Egam Rabbiy, Oʻz noming haqi menga madad ber, Ezgudir sodiq sevging, meni qutqar.

²²Men bir bechora, yoʻqsilman, Ichimda yuragim yaralangandir.

²³Oqshomgi soyaday yoʻq boʻlib boryapman, Chigirtkaday men uloqtirilganman.

²⁴Roʻza tutganimdan tizzalarimda darmon yoʻq, Etim suyagimga yopishib qolgan.

²⁵Dushmanlarim haqoratining nishoniman, Meni koʻrganlarida masxaralab, boshlarini chayqashar.

²⁶Ey Egam Xudo, menga madad bergin, Sodiq sevging haqi meni xalos qilgin.

²⁷Buni Sening qoʻling qilganini dushmanlarim bilsin, Ey Egam, menga najot bergan Sen ekaningni ular bilsin.

²⁸Mayli, ular meni la’natlasin, Sen esa menga baraka berasan. Ular hujum qilganda, sharmanda boʻlishsin, Men — quling esa shod — xurram boʻlay.

²⁹Meni ayblovchilar badnomlikka burkansin, Chopon kiyganday, sharmandalikka oʻransin.

³⁰Egamga cheksiz shukronalar aytaman, Xaloyiq orasida Unga hamdu sano oʻqiyman.

³¹Egamiz turar yoʻqsillarning oʻng tomonida, Ularni oʻlimga mahkum etganlardan qutqarmoq uchun.