Read Uzbek Muqaddas Kitob Zabur 113 Bible Online

Zabur 113 - Uzbek Muqaddas Kitob bible

Zabur 113

¹Isroil xalqi Misrdan chiqib ketganda, Yahudo yurti Xudoning muqaddas maskani boʻldi. Ha, Yoqub nasli begona yurtdan ketganda, Isroil yurti Xudoning shohligi boʻldi.

³Dengiz Xudoni koʻrdi — yu, qochdi[325], Iordan daryosi orqaga qaytdi[326].

⁴Togʻlar qoʻchqorlar kabi sakradi[327], Tepaliklar qoʻzilar kabi irgʻidi.

⁵Ne boʻldi, ey dengiz, qochib ketding? Ne boʻldi, ey Iordan, orqaga qaytding?

⁶Ey togʻlar, nechun sakradingiz takalar kabi? Ey tepaliklar, nechun irgʻidingiz qoʻzilar kabi?

⁷Titragin, ey zamin, Rabbiy oldida, Yoqubning Xudosi huzurida.

⁸U qoyani suv hovuziga aylantirgan, Qattiq qoyadan buloq chiqargan[328].

⁹Ey Egam! Sodiq sevging, sadoqating haqi Senga sharaflar boʻlsin! Bizga emas, Senga sharaflar boʻlsin!

¹⁰Nima uchun begona xalqlar: “Qani ularning Xudosi”, deya aytarlar?

¹¹Bizning Xudoyimiz samolardadir, U istaganini qilaveradi.

¹²Xalqlarning xudolari esa kumush, oltindan, Inson qoʻllarining mahsulidir.

¹³Butlarning ogʻizlari bor, soʻzlay olmaslar, Koʻzlari bor, koʻra olmaslar.

¹⁴Ularning quloqlari bor, eshita olmaslar, Burunlari bor, hidlay olmaslar.

¹⁵Ularning qoʻllari bor, seza olmaslar, Oyoqlari bor, yura olmaslar, Boʻgʻizlaridan ovoz chiqara olmaslar.

¹⁶Butlarni barpo qilganlar, butlarga ishonganlar Xuddi ularga oʻxshagan boʻlib qolar.

¹⁷Ey Isroil xalqi! Ishoning Egamizga, U madad berar, qalqon boʻlar sizga!

¹⁸Ey Horun xonadoni![329] Ishoning Egamizga, U madad berar, qalqon boʻlar sizga!

¹⁹Ey Egamizdan qoʻrqqanlar! Ishoning Egamizga, U madad berar, qalqon boʻlar sizga!

²⁰Egamiz bizni yodda tutib, baraka beradi, Isroil xalqiga U baraka beradi, Horun xonadoniga U baraka beradi.

²¹Egamiz Oʻzidan qoʻrqqanlarga baraka beradi, Kattayu kichikka bir xilda baraka beradi.

²²Egamiz sizlarni, Bolalaringizni koʻpaytirsin.

²³Yeru osmonni yaratgan Egamiz Sizlarga baraka bersin.

²⁴Samolar Egamizning samolaridir, Yerni esa U insonlarga bergandir.

²⁵Oʻlim sukunatiga botgan marhumlar Egamizga hamdu sano aytmaslar.

²⁶Biz esa Egamizga hozir ham, abadulabad Olqishlar aytamiz. Egamizga hamdu sanolar boʻlsin!