Read Uzbek Muqaddas Kitob Zabur 117 Bible Online

Zabur 117 - Uzbek Muqaddas Kitob bible

Zabur 117

¹Egamizga shukrona ayting, U yaxshidir, Uning sodiq sevgisi abadiydir.

²Isroil xalqi shunday desin: “Uning sodiq sevgisi abadiydir.”

³Horun avlodi shunday aytsin: “Uning sodiq sevgisi abadiydir.”

⁴Egamizdan qoʻrqqanlar shunday aytsin: “Uning sodiq sevgisi abadiydir.”

⁵Kulfatda qolganimda Egamga iltijo qildim, Javob berib, U meni ozod qildi.

⁶Egam men bilan birga, shu bois qoʻrqmayman. Insonlar menga nima qila oladi?!

⁷Egam men bilan birga, U menga madad beradi, Koʻzlarim dushmanlarim magʻlubiyatini koʻradi.

⁸Insondan umid qilgandan koʻra, Egamizdan panoh izlash yaxshidir.

⁹Shahzodalardan umid qilgandan koʻra, Egamizdan panoh izlash yaxshidir.

¹⁰Dushman xalqlar oʻrab olgan atrofimni, Egamning qudrati bilan ularni uloqtirdim.

¹¹Har tarafdan oʻrab, menga hujum qilgandi, Egamning qudrati bilan ularni uloqtirdim.

¹²Atrofimni arilarday oʻrab oldilar, Tikan alangasiday lov etdilar — da, oʻchdilar, Egamning qudrati bilan ularni uloqtirdim.

¹³Meni qattiq turtganlarida, yiqilayozdim, Egam menga madad berdi.

¹⁴Egam mening kuch — qudratimdir[332], U mening qutqaruvchimdir.

¹⁵Solihlarning chodirlarida Shodlik, zafar qoʻshiqlari jaranglaydi: “Egamizning oʻng qoʻli magʻlub qiladi.

¹⁶Egamizning oʻng qoʻli baland koʻtariladi, Ha, Egamizning oʻng qoʻli magʻlub qiladi.”

¹⁷Men oʻlmayman. Ha, men yashayman, Egamning ishlarini naql qilaman.

¹⁸Egam meni qattiq jazoladi, Lekin oʻlishimga yoʻl qoʻymadi.

¹⁹Adolat darvozalarini menga ochinglar, Toki men darvozadan kirib, Egamga shukronalar aytayin.

²⁰Bu Egamizning darvozasidir, Solihlar shu darvozadan kirsin.

²¹Ey Egam, ibodatimga javob berganing uchun, Mening najotkorim boʻlganing uchun Senga shukrona aytaman.

²²Binokorlar rad etgan tosh Binoning tamal toshi[333] boʻldi.

²³Bu Egamizning qilgan ishidir, Koʻz oldimizdagi ajoyibotdir.

²⁴Egamiz yaratgan kundir bu, Bu kunda shod boʻlib, sevinaylik.

²⁵Najot ber bizga, yolvoramiz, ey Egam! Muvaffaqiyat ber, oʻtinamiz, ey Egam!

²⁶Egamiz nomidan keladigan zot baraka topsin, Egamiz uyidan turib, seni duo qilamiz.

²⁷Egamiz Xudodir, U bizga nur bergan. Bayram nishonlashni boshlang! Palma shoxlarini olib, qurbongoh oldiga boring[334].

²⁸Sen Xudoyimsan, Senga shukur aytaman, Sen Xudoyimsan, Seni ulugʻlayman.

²⁹Egamizga shukrona ayting, U yaxshidir, Uning sodiq sevgisi abadiydir.