Read Uzbek Muqaddas Kitob Zabur 118 Bible Online

Zabur 118 - Uzbek Muqaddas Kitob bible

Zabur 118

¹[335] Baxtlidir yoʻllari pok boʻlganlar, Ey Egam, Sening qonuning boʻyicha yuradiganlar.

²Baxtlidir Sening shartlaringga rioya qiladiganlar, Butun qalbi bilan Senga intiladiganlar.

³Ular aslo nohaq ish qilmaydilar, Sening yoʻllaringdan yuradilar.

⁴Oʻzing bizga amr berib, Buyruqlarimga diqqat ila itoat eting, degansan.

⁵Qaniydi farmonlaringni ado etishda barqaror boʻlsam!

⁶Men sharmanda boʻlib qolmay, deya Hamma amrlaringga diqqat qilaman.

⁷Sening odil qoidalaringni oʻrganganimda, Toza qalb ila hamdu sano aytaman Senga.

⁸Sening qonunlaringni bajaraman, Meni hech qachon tark etmagin.

⁹Yigit qanday qilib yoʻllarini pok saqlaydi? Kaloming boʻyicha yashab, shunga erishadi.

¹⁰Butun qalbim bilan Senga intilaman, Amrlaringdan ogʻishimga yoʻl qoʻymagin.

¹¹Soʻzlaringni yuragimda asrayman, Toki Senga qarshi gunoh qilmayin.

¹²Ey Egam, Senga olqishlar boʻlsin, Farmonlaringni oʻrgatgin menga.

¹³Ogʻzingdan chiqqan barcha qoidalarni Oʻz ogʻzim bilan e’lon qilaman.

¹⁴Shartlaringga ergashib, lazzat topaman, Goʻyo katta boylik topib xursand boʻlaman.

¹⁵Buyruqlaring haqida chuqur fikr yuritaman, Sening yoʻllaringga diqqat qilaman.

¹⁶Farmonlaringdan lazzat olaman, Kalomingni men unutmasman.

¹⁷Men, Oʻz qulingga yaxshilik qilgin, Toki yashab, kalomingga itoat etayin.

¹⁸Koʻzlarimni och, toki koʻrayin Qonuningdagi ajoyibotlarni.

¹⁹Yer yuzida musofirday yashayman, Amrlaringni mendan yashirma.

²⁰Jonim kuymoqda hasrat bilan, Qoidalaringni oʻrganishni doim istayman.

²¹La’natlangan takabburlarga, Amrlaringdan ogʻib ketganlarga Sen tanbeh berasan.

²²Haqorat, xoʻrlikni mendan uzoqlashtir, Axir, shartlaringni doim bajarganman.

²³Hatto shahzodalar toʻplanib, menga boʻhton qilsalar ham Men farmonlaring haqida chuqur fikr yuritaman.

²⁴Sening shartlaring menga lazzat bagʻishlaydi, Shartlaring men uchun maslahatchidirlar.

²⁵Jonim chiqay deb turibdi, Va’dangga koʻra, hayotimni saqlagin.

²⁶Hayotim haqida Senga aytib berdim, Sen javob berding. Endi farmonlaringni menga oʻrgatgin.

²⁷Menga buyruqlaringni tushuntir, Toki moʻjizalaring haqida chuqur fikr yuritay.

²⁸Jonim ado boʻldi gʻam — gʻussadan, Quvvat bergin menga va’dangga binoan.

²⁹Soxta yoʻllardan meni saqlagin, Iltifot ila qonuningni menga oʻrgatgin.

³⁰Men sadoqat yoʻlini tanlaganman, Qoidalaringni yuragimga jo qilganman.

³¹Ey Egam, shartlaringni mahkam ushlaganman, Endi sharmanda boʻlishimga yoʻl qoʻymagin.

³²Jonim bilan amrlaringni bajaraman, Zotan, menga koʻp zakovat ato qilasan.

³³Ey Egam, menga farmonlaringni oʻrgat, Toki men ularni oxirigacha bajarayin.

³⁴Zakovat ber menga, toki qonuningga rioya qilay, Chin qalbimdan qonuningni bajaray.

³⁵Amrlaring soʻqmogʻidan meni yetaklagin, Men undan lazzat topaman.

³⁶Yuragimni nohaq foyda tomon emas, Oʻz shartlaring tomon burgin.

³⁷Koʻzlarimni befoyda narsalardan qaytargin, Va’dangga binoan hayotimni saqlagin[336].

³⁸Men, Oʻz qulingga bergan va’dangda turgin, Bu va’dang Sendan qoʻrqadiganlar uchundir.

³⁹Sharmandalikdan qoʻrqaman, mendan uzoq qil, Zotan, qoidalaring ezgudir.

⁴⁰Buyruqlaringga naqadar talpinaman, Adolating bilan hayotimni saqlagin.

⁴¹Sodiq sevgingni, ey Egam, menga koʻrsat, Va’dangga koʻra, menga najot ber.

⁴²Shunda meni haqorat qilganlarga javob beraman, Sening kalomingga umid qilaman.

⁴³Ogʻzimdan haqiqat kalomini tamom tortib olma, Sening qoidalaringga umid bogʻlaganman.

⁴⁴Qonuningga doimo rioya qilaman, Abadulabad uni bajaraman.

⁴⁵Men ozod boʻlib yuraveraman, Buyruqlaringni izlab topganman.

⁴⁶Shohlar oldida shartlaringdan soʻylayman, Sharmanda boʻlmasman.

⁴⁷Amrlaringdan lazzat topaman, Men amrlaringni sevaman.

⁴⁸Amrlaringga izzatu sevgi koʻrsataman, Farmonlaring haqida chuqur fikr yuritaman.

⁴⁹Esla men, qulingga bergan va’dangni, Sen va’da berib, umidvor qilgansan meni.

⁵⁰Kulfatda qolganimda shu menga tasalli beradi, Sening va’dang mening hayotimni saqlaydi.

⁵¹Takabbur meni tamom masxara qiladi, Shunda ham qonuningdan yuz oʻgirmasman.

⁵²Azaliy qoidalaringni, ey Egam, eslayman, Bu qoidalaringdan men tasalli topaman.

⁵³Fosiq qonuningdan yuz oʻgirgan, Shu bois men qattiq gʻazablanaman.

⁵⁴Qayerda boshpana qilgan boʻlmayin, Farmonlaringni qoʻshiq qilib kuylayman.

⁵⁵Ey Egam, tunda ham Seni eslayman, Sening qonunlaringga rioya etaman.

⁵⁶Bu menga odat boʻlgan edi, Buyruqlaringga rioya qildim.

⁵⁷Ey Egam, Sen mening xavfsizligim manbaisan, Kalomingga itoat etaman, deb va’da beraman.

⁵⁸Jamolingni izladim chin qalbimdan, Mehribon boʻl menga va’dangga binoan.

⁵⁹Yoʻllarimga diqqat qildim, Shartlaring boʻyicha qadam bosaman.

⁶⁰Men shoshilaman, kechikmasman Amrlaringga itoat etmoq uchun.

⁶¹Fosiqlar meni arqonlar bilan bogʻlaydi, Shunda ham Sening qonuningni unutmayman.

⁶²Yarim tunda uygʻonib, odil qoidalaring uchun Senga hamdu sano aytaman.

⁶³Sendan qoʻrqqanlarga men doʻstman, Buyruqlaringga rioya qilganlarga sherikman.

⁶⁴Ey Egam, sodiq sevgingdan zamin toʻlgandir, Farmonlaringni menga oʻrgat.

⁶⁵Ey Egam, Oʻzing bergan va’dangga muvofiq Men, Oʻz qulingga yaxshilik qilding.

⁶⁶Menga donolik, zukkolik bergin, Sening amrlaringga ishondim.

⁶⁷Jazo olmasimdan oldin adashar edim, Endi Sening soʻzingga itoat etaman.

⁶⁸Naqadar yaxshisan, ezgulik qilasan, Farmonlaringni menga oʻrgatgin.

⁶⁹Takabbur yolgʻon soʻylab, meni qoraga chaplar, Men esa chin qalbdan buyruqlaringga itoat etaman.

⁷⁰Ularning qalbini yogʻ bogʻlagan, Men esa qonuningdan lazzat olaman.

⁷¹Tortgan jazoim menga saboq boʻldi, Shu orqali farmonlaringni oʻrgandim.

⁷²Minglab oltinu kumushdan koʻra, Yaxshidir men uchun ogʻzingdan chiqqan qonun.

⁷³Qoʻllaring meni yaratgan, barpo qilgan, Amrlaringni oʻrganishga menga idrok bergin.

⁷⁴Sendan qoʻrqqanlar meni koʻrib, sevinsinlar, Zotan, Sening kalomingga umid qilganman.

⁷⁵Ey Egam, hukmlaring adolatliligini bilaman, Menga jazo berganingda, Sen haq eding.

⁷⁶Men, Oʻz qulingga bergan va’dangga koʻra, Sodiq sevging menga tasalli boʻlsin.

⁷⁷Menga shafqat qilgin, toki yashayin, Axir, Sening qonuning men uchun lazzat.

⁷⁸Yolgʻon gapirib, menga zarar qilgani uchun Takabburlar sharmanda boʻlsin. Men esa buyruqlaring haqida fikr yuritaman.

⁷⁹Men tomon kelsin Sendan qoʻrqqanlar, Sening shartlaringni biladiganlar.

⁸⁰Farmonlaringni bitta qolmay bajaray, Toki men sharmanda boʻlib qolmay.

⁸¹Najotingni kutib, jonim ado boʻlmoqda, Sening kalomingdan umid qilmoqdaman.

⁸²Va’dalaringni kutib, koʻzimning nuri soʻnadi, “Qachon menga tasalli berasan?” deya soʻrayman.

⁸³Tutunda qorayib, bujmaygan meshday[337] boʻlsam ham, Sening farmonlaringni men unutmaganman.

⁸⁴Qachongacha men, quling, kutishim kerak? Meni ta’qib qiluvchilarni qachon hukm qilasan?

⁸⁵Takabburlar menga chuqur qazirlar, Sening qonuningga ular qarshi chiqarlar.

⁸⁶Hamma amrlaring umidbaxshdir. Meni sababsiz ta’qib etarlar, yordam ber!

⁸⁷Ular meni yer yuzidan yoʻq qilay, dedi, Ammo buyruqlaringni men tark etmadim.

⁸⁸Sodiq sevging haqi saqla hayotimni, Toki ogʻzingdan chiqqan shartlarga rioya qilay.

⁸⁹Kaloming, ey Egam, to abaddir, U samolarda mustahkam turadi.

⁹⁰Sening sadoqating nasllar osha davom etadi, Yerni barqaror qilgansan, u to abad turaveradi.

⁹¹Qoidalaring tufayli Yeru osmon bugun ham mustahkamdir, Butun olam qoʻling ostidadir.

⁹²Agar qonuning men uchun lazzat boʻlmasaydi, Tortgan gʻamu kulfatlarimdan tamom boʻlardim.

⁹³Men buyruqlaringni hech qachon unutmayman, Bular orqali Sen hayotimni saqlagansan.

⁹⁴Men Senikidirman, meni qutqargin, Zotan, men buyruqlaringni bajarishga intilganman.

⁹⁵Fosiqlar meni oʻldirishga payt poylaydi, Men esa shartlaring haqida chuqur fikr yuritaman.

⁹⁶Jamiki komillikning cheklanganini koʻrdim, Sening amrlaring esa chegarasizdir.

⁹⁷O, naqadar sevaman qonuningni! Kun boʻyi xayolimda tutaman uni.

⁹⁸Amrlaring meni gʻanimlarimdan koʻproq dono qildi, Amrlaring doimo men bilan birga.

⁹⁹Barcha ustozlarimdan ham ziyrakroq boʻldim, Sening shartlaring ustida fikr yuritaman.

¹⁰⁰Yoshi ulugʻlardan ham donoroq boʻldim, Chunki Sening buyruqlaringga itoat etaman.

¹⁰¹Har qanday yomon yoʻldan qadamimni tiydim, Toki Sening kalomingga itoat etay dedim.

¹⁰²Qoidalaringdan men qaytmadim, Menga Oʻzing ta’lim bergansan.

¹⁰³Soʻzlaring men uchun naqadar mazalidir, Asaldan ham shirin tuyular ogʻzimga.

¹⁰⁴Buyruqlaring tufayli men dono boʻlaman, Har qanday yolgʻon yoʻldan nafratlanaman.

¹⁰⁵Sening kaloming qadamlarim uchun chiroqdir, Yoʻlimga nur sochadigan yorugʻlikdir.

¹⁰⁶Adolatli qoidalaringni bajaraman, deb Ont ichdim va bu ontimga vafo qilaman.

¹⁰⁷Ey Egam, men koʻp jafo chekdim, Va’dangga koʻra, hayotimni saqla.

¹⁰⁸Ey Egam, maqtov nazrlarimni qabul etgin, Menga qoidalaringni oʻrgatgin.

¹⁰⁹Hayotim har on xavfda boʻlsa ham, Sening qonuningni men unutmayman.

¹¹⁰Fosiqlar menga tuzoq qoʻydilar, Shunda ham buyruqlaringdan ogʻib ketmadim.

¹¹¹Sening shartlaring to abad mening mulkimdir, Shartlaring qalbimning quvonchidir.

¹¹²Farmonlaringni to abad ijro etmoqqa Yuragimni moyil qildim.

¹¹³Ikkiyuzlamachilardan men nafratlanaman, Sening qonuningni sevaman.

¹¹⁴Sen mening panohimsan, qalqonimsan, Sening kalomingga umid bogʻlayman.

¹¹⁵“Ey badkirdorlar, yoʻqoling koʻz oldimdan, Men Xudoyimning amrlarini bajaray”, deb aytaman.

¹¹⁶Va’dangga koʻra, menga tayanch boʻl, toki yashayin, Umidim puchga chiqmasin, sharmanda boʻlmayin.

¹¹⁷Suyanchiq boʻl menga, toki najot topayin, Farmonlaringga doim diqqat bilan boqayin.

¹¹⁸Farmonlaringdan toyganlarni rad etding, Ularning hiylayu nayranglari behudadir.

¹¹⁹Yer yuzidagi jamiki fosiqlarni Axlatday uloqtirib tashlaysan, Shu bois men shartlaringni sevaman.

¹²⁰Sendan qoʻrqqanimdan vujudim titraydi, Hukmlaringdan meni vahima bosadi.

¹²¹Adolatli, toʻgʻri ishlar qilganman, Meni zolimlar qoʻlida qoldirma.

¹²²Men, qulingning baxtiga kafolat bergin, Takabburlar meni ezishlariga yoʻl qoʻymagin.

¹²³Najotingni kutaverib, koʻzim toʻrt boʻldi, Va’da qilgan najoting armonida koʻzim nuri toʻkildi.

¹²⁴Men, Oʻz qulingga sodiq sevgingni koʻrsatgin, Farmonlaringni menga oʻrgatgin.

¹²⁵Sening qulingman, menga idrok bergin, Toki men shartlaringni bilib olayin.

¹²⁶Ey Egam, vaqti keldi, Oʻz ishingni qil, Sening qonuning buzildi.

¹²⁷Chindan ham Sening amrlaringni Oltindan, eng sof oltindan ham koʻproq sevaman.

¹²⁸Sening buyruqlaringga koʻra, qadam bosaman, Har qanday yolgʻon yoʻldan nafratlanaman.

¹²⁹Sening shartlaring ajoyibdir, Shu bois ularga itoat etaman.

¹³⁰Kalomingning ta’limoti ziyo sochadi, Soddalarga aql — idrok beradi.

¹³¹Ogʻzim ochilib, ogʻir nafas olaman, Chunki Sening amrlaringga juda intilaman.

¹³²Men tomon yuz bur, menga shafqat qilgin, Axir, Seni sevganlarga doim shafqat koʻrsatasan.

¹³³Soʻzingga koʻra, qadamimni Oʻzing boshqargin, Hech qachon ustimdan gunoh hukmron boʻlmasin.

¹³⁴Inson zulmidan meni qutqargin, Toki Sening buyruqlaringga itoat etayin.

¹³⁵Jamoling menga nurlarini sochsin, Farmonlaringni menga oʻrgatgin.

¹³⁶Koʻzlarimdan yoshlar daryo boʻlib quyilar, Axir, odamlar qonuningga rioya qilmayapti.

¹³⁷Sen odilsan, ey Egam, Hukmlaring adolatlidir.

¹³⁸Adolat ila shartlaringni buyurgansan, Tamomila ishonchlidir shartlaring.

¹³⁹Gʻazabim meni ado qilmoqda, Dushmanlarim kalomingni rad etmoqda.

¹⁴⁰Va’dalaring naqadar sofdir! Men va’dalaringni naqadar sevaman!

¹⁴¹Men keraksizman, xoʻrlanganman, Buyruqlaringni unutmayman.

¹⁴²Sening adolating mangudir, Sening qonuning haqiqatdir.

¹⁴³Boshimga kulfatu azob keldi, Amrlaring menga zavq berar.

¹⁴⁴Shartlaring to abad adolatlidir, Idrok bergin menga, toki yashayin.

¹⁴⁵Ey Egam, chin koʻngildan yolvoraman, javob ber, Farmonlaringga rioya qilaman.

¹⁴⁶Senga faryod qilaman, meni qutqargin, Toki shartlaringga men rioya qilay.

¹⁴⁷Kun chiqmasdan Sendan madad soʻrab faryod qilaman, Sening kalomingga men umid bogʻlayman.

¹⁴⁸Sening va’dangni chuqur anglay deb, Koʻzlarimga tun boʻyi uyqu kelmaydi.

¹⁴⁹Sodiq sevgingga koʻra, ovozimni eshitgin, Ey Egam, adolating bilan hayotimni saqlagin.

¹⁵⁰Qabih reja tuzadiganlar yaqin kelmoqda, Ular qonuningdan uzoqda yuradi.

¹⁵¹Sen esa, ey Egam, yonimdasan, Hamma amrlaring haqiqatdir.

¹⁵²Qonuningni Sen mangu barqaror qilgansan, Yoshligimdan buni men bilaman.

¹⁵³Azoblarimga qaragin, meni qutqargin, Axir, men Sening qonuningni unutmadim.

¹⁵⁴Mening da’voimni isbot qil, meni qutqar, Va’dangga koʻra, hayotimni saqla.

¹⁵⁵Fosiqdan najot uzoqdadir, Sening farmonlaringni ular izlamaslar.

¹⁵⁶Ey Egam, shafqating buyukdir, Adolating bilan hayotimni saqla.

¹⁵⁷Meni ta’qib qiluvchi dushmanlarim koʻp, Men shartlaringdan yuz oʻgirmayman.

¹⁵⁸Makkorlarga nafrat ila qarayman, Ular Sening amrlaringga rioya qilmaydi.

¹⁵⁹Qaragin, naqadar sevaman buyruqlaringni, Sodiq sevgingga koʻra, saqlagin hayotimni.

¹⁶⁰Kaloming mohiyati haqiqatdir, Adolatli qoidalaring to abad davom etadi.

¹⁶¹Hukmdorlar meni sababsiz ta’qib qilar, Yuragim kalomingdan qoʻrqib titrab turar.

¹⁶²Xuddi ulkan xazina topgan odamday, Sening soʻzingdan shod boʻlaman.

¹⁶³Yolgʻondan nafratlanib, jirkanaman, Sening qonuningni esa sevaman.

¹⁶⁴Sening adolatli qoidalaring tufayli Yetti marta kuniga Seni madh qilaman.

¹⁶⁵Qonuningni sevganlar buyuk tinchlikka ega boʻlar, Hech narsa ularga toʻsiq boʻla olmaydi.

¹⁶⁶Ey Egam, men najotingga umid qilaman, Men Sening amrlaringni bajaraman.

¹⁶⁷Shartlaringga itoat etaman, Men ularni gʻoyatda sevaman.

¹⁶⁸Buyruq, shartlaringga rioya qilaman, Hamma yoʻllarim Senga ma’lumdir.

¹⁶⁹Ey Egam, ohu nolam yetsin Senga, Kalomingga koʻra, menga idrok bergin.

¹⁷⁰Iltijoim yetib borsin Senga, Bergan va’dangga koʻra, meni qutqargin.

¹⁷¹Lablarimdan hamdu sano toʻlib — toshsin, Menga oʻrgatasan farmonlaringni.

¹⁷²Tilim kuylaydi Sening va’dangni, Zotan, adolatlidir barcha amrlaring.

¹⁷³Menga yordamga tayyor turgin, Zotan, tanlaganman men buyruqlaringni.

¹⁷⁴Ey Egam, najotingga talpinaman, Sening qonuningdan lazzat topaman.

¹⁷⁵Umr ber menga, hamdu sano aytayin Senga, Qoidalaring yordam bersin menga.

¹⁷⁶Adashgan qoʻyday yoʻldan ozganman, Izlab top meni, Oʻz qulingni. Zotan, men amrlaringni unutmaganman.