Read Uzbek Muqaddas Kitob Zabur 131 Bible Online

Zabur 131 - Uzbek Muqaddas Kitob bible

Zabur 131

¹Ziyorat qoʻshigʻi. Ey Egam, eslagin Dovudni, U tortgan barcha azob — uqubatlarni!

²Ey Egam, u Senga qasam ichgandi. Ey Yoqubning qudratli Xudosi, U Senga va’da bergandi:

³“Men aslo uyimga kirmayman, Yoki oʻrnimga yotmayman.

⁴Koʻzlarimga uyqu bermayman, Qovoqlarim yumilishiga yoʻl qoʻymayman.

⁵Egamiz uchun bir joy topmagunimcha, Yoqubning qudratli Xudosi uchun Bir maskan boʻlmaguncha aslo dam olmayman.”

⁶Ahd sandigʻi Efratda[346], deb eshitgandik, Biz uni Yoʻr[347] dalalarida topib oldik.

⁷“Egamizning maskaniga boraylik, Uning poyiga sajda qilaylik”, dedik.

⁸Qani, kel, ey Egam, oromgohingga Qudrating ramzi boʻlgan Sandiq bilan birga.

⁹Ruhoniylaring solihlikni kiysinlar, Taqvodorlaring shodlikdan kuylasinlar!

¹⁰Oʻz quling Dovudning haqi — hurmati, Tanlagan shohingni rad qilmagin.

¹¹Ey Egam, Sen Dovudga ont ichgan eding, Sen shu ontingdan aslo qaytmay deysan: “Oʻzingdan bino boʻlgan oʻgʻillaringdan Birini sening taxtingga oʻtqazaman.

¹²Agar oʻgʻillaring Mening ahdimga rioya qilsa, Ularga oʻrgatgan amrlarimga itoat etsa, Ularning oʻgʻillari ham Shoh boʻlib, to abad sening taxtingda oʻtiradi.”

¹³Ey Egam, Sen Quddusni[348] tanlagansan, U yerni Oʻzingga maskan qilishni istagansan.

¹⁴Sen shunday deding: “Men to abad yashaydigan joy shu joydir, Bu yerda istiqomat qilishni istaganman.

¹⁵Uning ozuqalariga moʻl qilib baraka beraman, U yerdagi faqirlarni toʻydiraman.

¹⁶Ruhoniylarni najotga burkayman, Taqvodorlari shodlikdan kuylaydilar!

¹⁷Dovudning naslini bu yerda koʻkartiraman, Oʻzim tanlagan shohning chirogʻini oʻchirmayman.

¹⁸Uning gʻanimlarini sharmandalikka oʻrayman, Shohning boshidagi toji esa porlab turaveradi.”