Read Uzbek Muqaddas Kitob Zabur 134 Bible Online

Zabur 134 - Uzbek Muqaddas Kitob bible

Zabur 134

¹Egamizga hamdu sanolar boʻlsin! Egamizning nomiga madhiyalar boʻlsin! Hamdu sano ayting, ey Egamizning qullari,

²Ey Egamizning uyida xizmat qiladiganlar, Ey Egamiz uyining hovlisida xizmat qiladiganlar!

³Egamizga hamdu sanolar boʻlsin, U yaxshidir! Tarannum eting Uni, bu[352] yoqimlidir.

⁴Egamiz Oʻzi uchun Yoqub naslini tanladi. Ha, Oʻzimning xazinam deb, Isroil xalqini tanladi.

⁵Ha, bilaman, Egamiz ulugʻdir, Rabbimiz barcha xudolardan yuksakdir.

⁶Osmonda ham, zaminda ham, Dengizlarda, jamiki tubsiz suvlarda Egamiz istaganini qiladi.

⁷U yerning toʻrt tomonidan bulutlarni olib keladi, Yomgʻir bilan birga chaqmoq yuboradi, Omborlaridan shamol olib keladi.

⁸Egamiz Misrning toʻngʻichlarini, Inson hamda hayvonlarning birinchi tugʻilganlarini nobud qildi[353].

⁹Fir’avn va uning hamma a’yonlariga qarshi Misrning orasiga Egamiz alomatu moʻjizalarni yubordi[354].

¹⁰U koʻp ellar, xalqlarni qirgan, Qudratli shohlarni boʻgʻizlagan.

¹¹Amor xalqining shohi Sixoʻnni, Bashan shohi Oʻgni Hamda Kan’onning barcha shohlarini qirgan[355].

¹²Ularning yerini Isroil xalqiga mulk qilib berdi.

¹³Egamizning nomi to abad davom etar, Egamizning shuhrati nasllar osha davom etar.

¹⁴Egamiz Oʻz xalqiga adolat qiladi, Oʻz qullariga rahm — shafqat qiladi.

¹⁵Xalqlarning xudolari esa kumush, oltindan, Inson qoʻllarining mahsulidir.

¹⁶Butlarning ogʻizlari bor, soʻzlay olmaslar, Koʻzlari bor, koʻra olmaslar.

¹⁷Quloqlari bor ularning, eshita olmas, Ular aslo nafas ololmas.

¹⁸Butlarni barpo qilganlar, butlarga ishonganlar Xuddi ularga oʻxshagan boʻlib qolar.

¹⁹Ey Isroil xalqi, olqishlar ayting Egamizga! Ey Horun xonadoni[356], madhiyalar ayting Egamizga!

²⁰Ey Levi xonadoni[357], olqishlar ayting Egamizga! Ey Egamizdan qoʻrqqanlar, madhiyalar ayting Unga!

²¹Quddusda istiqomat qiladigan Egamizga Sionda olqishlar ayting! Egamizga hamdu sanolar boʻlsin!