Read Uzbek Muqaddas Kitob Zabur 138 Bible Online

Zabur 138 - Uzbek Muqaddas Kitob bible

Zabur 138

¹Ijrochilar rahbariga. Dovud sanosi. Ey Egam, meni Oʻzing sinab koʻrib, bilgansan,

²Qachon oʻtirib, qachon turishimni Oʻzing bilasan, Oʻy — xayollarimni uzoqdan turib anglab olasan,

³Yurishimni, yotishimni Sen tekshirasan, Barcha yoʻllarim Senga oyday ravshandir.

⁴Biron soʻz tilimga kelmasdan oldin, Ey Egam, Sen hammasini bilasan.

⁵Meni hamma tomondan oʻrab olgansan, Qoʻllaringni ustimga qoʻygansan.

⁶Donoliging men uchun juda ajoyibdir, Shu qadar yuksakki, men anglay olmasman.

⁷Sening Ruhingdan qochib, qayerga ham bora olaman?! Sening huzuringdan qayerga ham keta olaman?!

⁸Agar osmonga chiqsam, Sen oʻsha yerdasan! Oʻliklar diyoriga[371] tushsam ham, Sen oʻsha yerdasan!

⁹Saharning qanotlarini olib parvoz qilsam, Dengizning eng uzoq chetlariga oʻrnashsam,

¹⁰Hatto u yerda ham qoʻllaring meni yetaklar, Oʻng qoʻling meni quvvatlar.

¹¹Agarda: “Shubhasiz, meni zulmat qamrab oladi, Atrofimda kunduz tunga aylanadi”, deb aytsam,

¹²Hatto zulmat ham Sen uchun qorongʻi emas, Tun kunduz kabi nur sochar, Tunu kunduz Sen uchun birdir.

¹³Ichki a’zolarimni Sen yaratgansan, Onamning qornida menga shakl bergansan.

¹⁴Senga shukrona aytaman. Axir, qanday ajoyib qilib yaratilganman! Sening barcha ishlaring naqadar ajoyib, Buni men juda yaxshi bilaman.

¹⁵Men pinhon yaratilganimda, Yerning tubida[372] mahorat ila toʻqilganimda, Suyaklarim Sendan yashirin emas edi.

¹⁶Koʻzlaring koʻrgandi homila ekanimni. Menga ajratilgan kunlar kelmasdan, Hammasi kitobingga yozilgandi.

¹⁷Sening niyatlaring, ey Xudo, menga qadrlidir, Niyatlaringning son — sanogʻi naqadar koʻpdir.

¹⁸Qumdan ham koʻp boʻlardi agar ularni sanaganimda, Uygʻonganimda qarasam, hamon men bilan ekansan birga.

¹⁹Ey Xudo, koshki fosiqni oʻldirsang edi, Qonxoʻr mendan uzoqlashsa edi,

²⁰Sen haqingda ular fitna qiladilar, Dushmanlaring Sening noming bilan yolgʻon qasam ichadilar.

²¹Ey Egam! Sendan nafratlanganlardan men nafratlanmaymanmi?! Senga qarshi isyon qilganlardan men jirkanmaymanmi?!

²²Ulardan butunlay nafratlanaman, Ularni oʻzimning dushmanim deb bilaman.

²³Tekshirib koʻr meni, ey Xudo, yuragimni bil, Sinab koʻr meni, tashvishlarimni bil.

²⁴Bilgin — chi, mening biron qabihligim bormikan? Meni abadiy yoʻldan[373] yetaklab borgin.