Read Uzbek Muqaddas Kitob Zabur 143 Bible Online

Zabur 143 - Uzbek Muqaddas Kitob bible

Zabur 143

¹Dovud sanosi. Egamga, suyangan qoyamga olqishlar boʻlsin, U qoʻllarimni urushga, barmoqlarimni jangga oʻrgatgan.

²Egam doim menga sodiqdir, U mening qal’am, qoʻrgʻonim, xaloskorimdir. Ha, Egam mening qalqonim, Unda men panoh topaman, Xalqlarni[377] U menga boʻysundiradi.

³Ey Egam, inson zoti kimdirki, unga e’tibor bersang?! Bandalar[378] kimdirki, ular haqda oʻylasang?!

⁴Inson umri ogʻizdan chiqqan nafasga oʻxshar, Odamzodning hayoti oʻtkinchi soyaga oʻxshar.

⁵Ey Egam, koʻklarni yorib, pastga tushgin, Togʻlarga tekkin, ulardan tutun chiqsin.

⁶Chaqmoq chaqtir, yovlarni tirqiratgin, Oʻqlaringni ot, ularni sarosimaga solgin.

⁷Yuqoridan uzat qoʻlingni, meni qutqargin, Azim suvlardan meni chiqarib olgin, Begonalar qoʻlidan meni qutqargin.

⁸Ularning soʻzlari behuda, Qoʻlini koʻtarib, ular yolgʻon qasam ichadi.

⁹Ey Xudo, Senga yangi qoʻshiq kuylayman, Oʻn torli arfa chalib Seni tarannum etaman.

¹⁰Shohlarga Sen zafar ato etasan, Quling Dovudni shafqatsiz qilichdan qutqarasan.

¹¹Kelgindilarning qoʻlidan Meni xalos qil, qutqargin. Ularning soʻzlari behuda, Qoʻlini koʻtarib, ular yolgʻon qasam ichadi.

¹²Oʻgʻillarimiz yoshligida yaxshi oʻsgan koʻchatga oʻxshasin, Qizlarimiz saroyning oʻymakor ustunlariga oʻxshasin.

¹³Omborlarimiz noz — ne’matlarga toʻlib — toshsin, Qoʻylarimiz minglab, oʻn minglab yaylovlarda koʻpaysin.

¹⁴Hoʻkizimiz ogʻir yuklarni tortsin[379], Devorlarimiz darz ketmasin, Odamlarimiz surgun boʻlmasin, Koʻchalarimizda oh — voh, gʻamu kulfat boʻlmasin.

¹⁵Naqadar baxtlidir bunday insonlar! Baxtlidir Xudoni Egamiz deb bilgan xalq!