Read Uzbek Muqaddas Kitob Zabur 16 Bible Online

Zabur 16 - Uzbek Muqaddas Kitob bible

Zabur 16

¹Dovud ibodati. Ey Egam, haqli da’voimni eshit, Faryodimga e’tibor ber. Hiylasiz ogʻzimdan chiqqan Ibodatimga quloq tut.

²Begunohligimni koʻrsatgin Sen, Adolatni koʻrsin koʻzlaring.

³Hatto yuragimni taftish qilib, Tunda meni sinab koʻrsang, Agar meni imtihon qilsang, Yomon niyatni menda topa olmasding. Ogʻzim gunoh qilmas, qarorim shudir.

⁴Insonlar qilmishini men qilmadim, Sening amringga men itoat etdim, Zoʻravonning yoʻllaridan oʻzimni saqladim.

⁵Qadamlarim soʻqmoqlaringda sobit boʻldi, Oyoqlarim hech qachon toyib ketmadi.

⁶Senga iltijo qilaman, ey Xudo, Bilaman, Sen menga javob berasan. Menga quloq tutib, soʻzlarimni eshitgin.

⁷Sodiqligingni zohir et ajoyib ishlar ila. Raqiblardan qochib Senga borganlarga Oʻng qoʻling bilan najot berguvchi Sensan.

⁸Meni koʻzlaring qorachigʻiday asragin, Meni qanotlaring soyasida yashirgin,

⁹Meni talaydigan fosiqlardan asragin, Atrofimda shay turgan ashaddiy yovlarimdan yashirgin.

¹⁰Ularning yuragida shafqatga joy yoʻq, Ogʻizlari bilan kiborlarcha gapiradi.

¹¹Ular meni ta’qib qilib, oʻrab olganlar, Yerga urmoq uchun menga koʻzlarini tikadi.

¹²Dushmanlarim meni gʻajimoqchi boʻlgan sherga oʻxshaydi, Pana joyda pisib yotgan yirtqich sherga oʻxshaydi.

¹³Kel, ey Egam! Ularga qarshi yuz bur, Tiz choʻktirgin ularni! Qiliching ila fosiqlardan qutqargin meni!

¹⁴Ey Egam! Qudrating ila Meni bunday insonlardan qutqargin, Ularning nasibasi faqatgina bu dunyodadir. Tayyorlab qoʻygan achchiq koʻrgiliklaring bilan Ularni toʻydirgin, Hatto bolalariga ham yetsin, Nabiralari ham totib koʻrsin.

¹⁵Solih boʻlganim uchun men Seni koʻrgayman, Uygʻonib, jamolingni koʻrganimdan rozi boʻlgayman.