Read Uzbek Muqaddas Kitob Zabur 17 Bible Online

Zabur 17 - Uzbek Muqaddas Kitob bible

Zabur 17

¹Ijrochilar rahbariga. Egamizning quli Dovud sanosi. Egamiz Dovudni jamiki dushmanlari va Shoulning qoʻlidan ozod qilgandan keyin Dovud Egamizga atab shu qoʻshiqni aytdi.

²Seni sevaman, ey Egam, mening qudratim.

³Egam suyangan qoyamdir[25], mening qal’am, qutqaruvchimdir. Ha, Xudodir mening qoyam, Unda panoh topaman. Udir mening qalqonim, qudratli najotkorim[26], qoʻrgʻonim.

⁴Egamga iltijo qilaman, Gʻanimlarimdan U meni xalos qiladi. Egamizga hamdu sanolar boʻlsin!

⁵Meni oʻlim toʻrlari chirmab olgandi, Balo — qazo sellari dahshat ila bosib kelgandi.

⁶Ha, oʻliklar diyorining[27] toʻrlari meni oʻrab olgandi, Oʻlim oʻz tuzogʻiga meni asir qilgandi.

⁷Kulfatda qolganimda Egamga iltijo qildim, Ha, nola qildim Xudoyimga. U Ma’badidan turib, ovozimni eshitdi, Ohu nolam qulogʻiga yetib bordi.

⁸Oʻsha zamon yer yuzi titrab, tebrandi, Togʻlarning poydevori larzaga keldi, Egam gʻoyat gʻazabga mingan edi.

⁹Burnidan tutun buruqsab chiqardi, Ogʻzidan otash pishqirardi, Oldidan qip — qizil choʻgʻ yogʻilardi.

¹⁰U koʻklarni yorib, pastga tushdi, Oyoqlari ostida — qora bulut.

¹¹Egam bir karubga[28] minib uchdi, Yel qanotlari uzra uchib keldi.

¹²Atrofini zulmat bilan oʻradi, Quyuq, qora bulutlarni Oʻziga chayla qildi.

¹³Ulkan nur Egamning oldidan chiqdi, Doʻl va qip — qizil choʻgʻ qop — qora bulutlarni parchaladi.

¹⁴Egamizning ovozi koʻklarda guldiradi, Xudoyi Taoloning sadosi eshitildi[29].

¹⁵Oʻqlarini otdi, Chaqmoq chaqtirib, yovlarini tirqiratdi, Ularni sarosimaga soldi.

¹⁶Egamizning tahdidlaridan, Uning qahrli nafasidan Dengizning tubi koʻrinib qoldi, Zamin poydevori[30] yalangʻoch boʻlib qoldi.

¹⁷Egam yuqoridan qoʻl uzatib, meni tutdi, Bahaybat suvlardan meni chiqarib oldi.

¹⁸Meni kuchli gʻanimlarim qoʻlidan, Mendan nafratlangan yovlarimdan qutqardi, Ular mendan kuchli edilar.

¹⁹Qora kunimda ular menga hamla qildilar, Ammo Egam menga tayanch boʻldi.

²⁰Meni bexavotir joyga chiqarib qoʻydi, Mendan mamnun boʻlib, najot berdi.

²¹Egam solihligim uchun meni mukofotlaydi, Aybsizligim uchun meni taqdirlaydi.

²²Zero, men Egamning yoʻlidan yurdim, Axloqsizlik qilmadim, Xudoyimdan yuz oʻgirmadim.

²³Uning hamma qonun — qoidalariga rioya qildim, Farmonlarini chetga surib qoʻymadim.

²⁴Uning oldida benuqson boʻldim, Gunoh qilishdan oʻzimni saqladim.

²⁵Shu sababli Egam meni pok deb bildi, Solihligimga yarasha mukofot berdi.

²⁶Ey Egam! Senga sodiq boʻlganga Sen sodiq boʻlasan, Yaxshi insondan yaxshiligingni ayamaysan,

²⁷Pok kishiga pokligingni koʻrsatasan, Egrining ayyorligini oʻz boshiga solasan.

²⁸Ahli kamtarga esa najot berasan, Dimogʻdorni yerga urasan.

²⁹Ey Egam Xudo! Chirogʻimni yoquvchi Oʻzingsan, Zulmatni men uchun yorugʻlikka aylantirasan.

³⁰Ey Xudoyim! Senga suyanib lashkarni yoʻq qilaman, Senga suyanib devorlardan oshib oʻtaman.

³¹Xudoning yoʻli komildir, Egamizning kalomi chin haqiqatdir, Panoh izlab borganga U qalqondir.

³²Egamizdan boshqa Xudo kim ekan?! Xudoyimizdan boʻlak suyanchiq Qoya bormikan?!

³³Meni qudratli qiluvchi Xudodir, Yoʻlimni Oʻzi bexatar qiladi.

³⁴U oyoqlarimni kiyik oyogʻiday qiladi, Choʻqqilar uzra meni bexatar yurgizadi.

³⁵Qoʻllarimni jang qilishga oʻrgatadi, Barmoqlarim bronza yoyni buka oladi.

³⁶Ey Egam, Sen menga zafar qalqoningni bergansan, Oʻng qoʻling menga tayanch boʻladi, Madading esa meni yuksaltiradi.

³⁷Oyoqlarim uchun yoʻlimni keng qilgansan, Oyoqlarim sira ogʻib ketmaydi.

³⁸Gʻanimlarimni quvlab, tutib oldim, Ularni yoʻq qilmay ortga qaytmadim.

³⁹Shunday ezdimki ularni, tura olmadilar, Oyoqlarim ostida choʻzilib qoldilar.

⁴⁰Sen menga quvvat berib, jangga yubording, Menga qarshi otlangan yovni oldimda bosh egdirding.

⁴¹Gʻanimlarimni mendan qochirding, Mendan nafratlanganlarni men yoʻq qildim.

⁴²Ular madad soʻrab faryod qildilar, Najotkorni esa topolmadilar, Ey Egam, gʻanimlarim Senga yolvordilar, Ammo Sen javob bermading.

⁴³Shamolning changiday ularni ezdim, Yoʻldagi loydek sidirib tashladim.

⁴⁴Sen meni xalqning urush — janjalidan xalos etding. Meni ellarga yoʻlboshchi qilding, Oʻzim tanimagan elat menga qaram boʻldi.

⁴⁵Ovozimni eshitiboq quloq tutdi, Yot ellar menga boʻyin egdi.

⁴⁶Yot ellar holsizlanib yiqildi, Qaltirab manzilidan chiqib qochdi.

⁴⁷Egam barhayotdir! Suyangan Qoyamga olqishlar boʻlsin! Najotkorim Xudo yuksalsin!

⁴⁸Qasdimni olgan Xudodir, Xalqlarni menga U tobe qilgan,

⁴⁹Meni gʻanimlarimdan U qutqargan, Bosqinchilardan meni ustun qilgan, Meni zoʻravonlar qoʻlidan xalos etgan.

⁵⁰Shu bois, ey Egam, xalqlar ichra Senga hamdlar aytaman! Seni kuylab sano aytaman!

⁵¹Egamiz Oʻz shohini ulugʻ zafarlarga erishtiradi, Oʻzi tanlagan shoh Dovud va uning nasliga To abad sodiq sevgisini koʻrsatadi.