Read Uzbek Muqaddas Kitob Zabur 2 Bible Online

Zabur 2 - Uzbek Muqaddas Kitob bible

Zabur 2

¹Nega quturadi xalqlar?! Nega behuda fitna qilar elatlar?!

²Zamin shohlari Egamizga Va U tanlagan shohga qarshi saf tortadilar. Hukmdorlar fitna qoʻzgʻab, shunday deydilar:

³“Sindiraylik ular solgan kishanlarni, Olib tashlaylik boʻynimizdan sirtmoqlarni.”

⁴Samoda hukmron boʻlgan Rabbiy esa Ularni masxaralab, ustidan kuladi.

⁵Rabbiy gʻazab bilan ularni ogoh etadi, Qahrini sochib, vahimaga solib aytadi:

⁶“Men Sionga[1], Oʻzimning muqaddas tepaligimga Oʻz shohimni joylashtirdim.”

⁷Egamizning soʻzlarini shoh e’lon qilmoqda: “Egamiz menga shunday dedi: «Sen Mening oʻgʻlimsan, Bugun Men senga ota boʻldim[2].

⁸Tila, xalqlarni senga mulk qilib beraman, Yerning toʻrt tomoni seniki boʻladi.

⁹Temir xivchin ila ularni urib ezasan[3], Sopol koʻzani sindirganday ularni parchalaysan.»”

¹⁰Ey shohlar! Endi aql bilan ish qiling. Ey zamin hukmdorlari! Ogoh boʻling.

¹¹Qoʻrquv ila Egamizga sajda qiling! Vahima ila tavba qiling![4]

¹²Uning oʻgʻliga[5] ta’zim qiling, Boʻlmasa U gʻazablanadi, Yoʻlingizda yoʻq boʻlib ketasiz, Uning gʻazabi tez alanga oladi. Naqadar baxtlidir Unda panoh topganlar!