Read Uzbek Muqaddas Kitob Zabur 20 Bible Online

Zabur 20 - Uzbek Muqaddas Kitob bible

Zabur 20

¹Ijrochilar rahbariga. Dovud sanosi.

²Ey Egam! Sening qudrating tufayli shoh quvonadi, Sen bergan zafarlardan u naqadar lazzatlanar!

³Koʻnglidagi istaklarini roʻyobga chiqarding, Uning tilaklarini rad qilmading.

⁴Ulugʻ barakani unga ato qilding, Uning boshiga sof oltin toj kiygizding.

⁵Sendan umr soʻraganda, umr berding, Uzoq hamda boqiy umr baxsh etding.

⁶Shohning shuhrati Sen bergan zafarlar tufayli ulugʻdir, Unga dabdaba, ulugʻvorlik ato qilgan Sensan.

⁷Sen to abad unga baraka berasan, Unga juda yaqin boʻlib, Uni shodlikka toʻldirasan.

⁸Egamizga shohimiz umid bogʻlaydi, Xudoyi Taoloning sodiq sevgisi tufayli U hech qachon qoqilmaydi.

⁹Ey shohimiz, qoʻling barcha dushmanlaringni magʻlub qiladi, Ha, oʻng qoʻling sendan nafratlanganlarni magʻlub qiladi.

¹⁰Sen zohir boʻlganing zamon Qizigan tandirday ularni yondirasan. Egamiz Oʻz gʻazabi bilan ularni yutib yuboradi, Alanga ularni yondirib tashlaydi.

¹¹Ey shohimiz, ularning naslini Yer yuzidan qirib tashlaysan, Zurriyotini insoniyat orasidan yoʻqotasan.

¹²Dushmanlaring senga qarshi yomonlikni reja qilsalar, Ular senga qarshi fitna qoʻzgʻasalar, Hech narsaga erisha olmaydilar.

¹³Kamoningdan ularga oʻqlar otasan, Ortiga qochishga majbur qilasan.

¹⁴Oʻz qudrating tufayli yuksalaver, ey Egam, Qudratingni kuylab, hamdu sano aytamiz.