Read Uzbek Muqaddas Kitob Zabur 21 Bible Online

Zabur 21 - Uzbek Muqaddas Kitob bible

Zabur 21

¹Ijrochilar rahbariga. “Tongda chiqqan kiyik” kuyiga aytiladigan Dovud sanosi.

²Ey Xudoyim! Nega meni tark etding?! Nega mendan uzoqdasan shu qadar?! Ey Xudoyim! Nechun menga najot bermaysan?! Ohu nolalarimni eshitmaysan?!

³Ey Xudoyim, kun boʻyi iltijo qilaman, Sen esa javob bermaysan. Tun boʻyi yolvoraman, Ammo menga tinchlik yoʻq.

⁴Baribir Sen Muqaddas Xudosan, Isroilning hamdu sanosi qurshab olgan taxtingni.

⁵Ota — bobolarimning umidi Senda edi, Sen ularga najot berding.

⁶Ular Senga nola qilib, najot topdilar, Ular Senga ishonib, uyalib qolmadilar.

⁷Axir, men inson emas, bir qurtdirman. Odamlar hazar qilgan, xalqlar nafratlangan.

⁸Meni koʻrgan har kim ustimdan kular, Meni haqoratlab, bosh chayqab derlar:

⁹“Egangga ishon, Oʻzi qutqarib olar, Egang sendan mamnun boʻlsa, U najot berar.”

¹⁰Onam qornidan Sen meni chiqargan eding, Onam bagʻrida Oʻzing meni omon saqlagan eding.

¹¹Senga tayanaman tugʻilganimdan buyon, Mening Xudoyimsan onam dunyoga keltirgandan buyon.

¹²Mendan uzoq boʻlmagin! Axir, kulfat yonginamda — ku, Menga madad berguvchi biron kimsa yoʻq!

¹³Bir gala buqalar[34] Meni qurshab olgan, Ha, Bashan oʻlkasining[35] kuchli buqalari Meni oʻrab olgan.

¹⁴Oʻkirib oʻljasini pora qiladigan sherga oʻxshab, Men tomon ular ogʻizlarini katta ochgan.

¹⁵Hayotim suv kabi toʻkildi, Suyaklarim boʻgʻinidan boʻshashdi, Yuragim mum kabi ichimda erib ketdi.

¹⁶Madorim qurib, sopol parchasiday boʻlib qoldim[36], Tilim tanglayimga yopishib qoldi, Meni oʻlim toʻshagiga yotqizding.

¹⁷Atrofimda koʻppaklar izgʻiydi, Badkirdorlar toʻdasi meni qurshab olgandir, Qoʻlu oyoqlarimni ular ilma — teshik qiladi[37].

¹⁸Hamma suyaklarim koʻrinib turadi, Dushmanlarim koʻzlarini chaqchaytirib, Yeb qoʻygudek boʻladi.

¹⁹Kiyimlarimni ular oʻzaro boʻlishgan, Libosim uchun qur’a tashlashgan.

²⁰Mendan uzoq turma, ey Egam! Kuchim manbayi Sensan! Tez kel, yordam ber!

²¹Jonimni qilich damidan qutqar, Hayotimni koʻppaklar changalidan qutqar!

²²Sherlar ogʻzidan qutqargin meni! Yovvoyi buqalar shoxidan asragin meni! Sen iltijoimga javob berding.

²³Birodarlarimga Sen haqingda aytaman, Jamoa orasida Senga hamdu sano oʻqiyman.

²⁴Ularga shunday deyman: “Egamizga hamdu sano ayting, ey Undan qoʻrqqanlar! Egamizni ulugʻlang, ey Yoqub nasli! Egamizni izzatlang, ey Isroil nasli!

²⁵Kulfatda qolgan bechoradan Egamiz yuz oʻgirmadi. Uning qaygʻularidan hazar qilmadi, nafratlanmadi. Bechoraning nolalarini Egamiz eshitdi.”

²⁶Ulugʻ jamoa ichra Hamdu sano aytishimning sababi Sensan. Sendan qoʻrqqanlar oldida ontimni ado etaman.

²⁷Ey Egam, qashshoqlar yeb toʻyadilar[38], Senga yuz burganlar Seni madh qiladilar, Ular dunyo turguncha tursinlar!

²⁸Egamizni eslab, Unga yuz bursinlar Yer yuzidagi jamiki insonlar! Jamiki urugʻu elatlar Unga sajda qilsinlar!

²⁹Egamiz hokimiyati mutlaqdir, Elatlar ustidan U hukmrondir.

³⁰Jamiki boylar ham ziyofat yeb, Unga ta’zim qiladi. Tuproq ostiga ketayotganlar ham Unga sajda qiladi, Hatto oʻz hayotini saqlay olmaydiganlar ta’zim qiladi.

³¹Avlodlar Unga xizmat qiladi, Kelgusi nasllar Rabbiy haqida eshitadi.

³²Ular kelib Egamizning najoti haqida e’lon qiladi, Uning qilganlarini hali tugʻilmagan xalqlarga aytadi.