Read Uzbek Muqaddas Kitob Zabur 24 Bible Online

Zabur 24 - Uzbek Muqaddas Kitob bible

Zabur 24

¹Dovud sanosi. [45] Yuragimni ochaman Senga, ey Egam!

²Senga umid bogʻlayman, ey Xudoyim! Sharmanda boʻlishimga yoʻl qoʻymagin, Dushmanlarim mendan ustun kelmasin.

³Senga ishonganlar aslo boʻlmasin sharmanda. Sharmandalik kelsin Senga asossiz xiyonat qilganlarning boshiga.

⁴Ey Egam, yoʻllaringni menga koʻrsat, Soʻqmoqlaringni menga oʻrgat.

⁵Oʻzing meni boshlab borgin, Haqiqatingni menga oʻrgatgin, Najotkorim Xudo Oʻzingsan, Kun boʻyi Sendan umid qilaman.

⁶Yodingda tut, ey Egam, buyuk shafqatingni Hamda sevgida sodiqligingni. Axir, azaldan Sen shunday qilgansan.

⁷Yoshlikda qilgan gunohlarimni esga olmagin, Itoatsizliklarim uchun meni jazolamagin. Sodiq sevging haqi yodga ol meni, Axir, Sen yaxshisan, ey Egam!

⁸Egamiz yaxshi, adolatlidir! U gunohkorlarga yoʻl — yoʻriq koʻrsatadi.

⁹U kamtarni toʻgʻrilikka boshlaydi, Kamtarin insonni Oʻz yoʻliga oʻrgatadi.

¹⁰Egamiz qilgan har ishi orqali Uning ahdiga rioya qilganlarga Sevgisiyu sadoqatini koʻrsatadi.

¹¹Mening ayblarim koʻp. Ey Egam, Oʻz noming haqi Ayblarimni kechirgin.

¹²Agarda inson Egamizdan qoʻrqsa, Egamiz unga toʻgʻri yoʻl tanlashni oʻrgatadi.

¹³Oʻsha inson umrini farovonlikda oʻtkazadi, Uning nasli yurtni mulk qilib oladi.

¹⁴Egamiz Undan qoʻrqadiganlarga Oʻz niyatlarini ishonib bildiradi, Oʻz ahdini ularga ma’lum qiladi.

¹⁵Nigohim doimo Egam tomondadir, U oyoqlarimni tuzoqdan xalos qiladi.

¹⁶Ey Egam, holimga boq, mehribonlik qil. Men yolgʻizman, tushkunlikka tushganman.

¹⁷Yurakdagi gʻamlarim ortib bormoqda, Shu kulfatdan meni qutqargin.

¹⁸Kulfatu gʻamlarimni koʻrib, Barcha gunohlarimdan oʻtgin.

¹⁹Qara, dushmanlarim naqadar koʻp, Mendan qattiq nafrat qilarlar.

²⁰Hayotimni asra, qutqargin meni, Sharmandali ahvolga solmagin meni, Zotan, Senda panoh topaman men.

²¹Haqqoniylik, toʻgʻrilik saqlasin meni, Zotan, Sendan umid qilaman men.

²²Ey Xudo, qutqargin Isroilni Jamiki kulfatlaridan!