Read Uzbek Muqaddas Kitob Zabur 26 Bible Online

Zabur 26 - Uzbek Muqaddas Kitob bible

Zabur 26

¹Dovud sanosi. Egam nurim va najotimdir, Kimdan qoʻrqaman?! Egam hayotimning qal’asidir, Kim meni qoʻrqita olar?!

²Meni oʻldirmoqchi boʻlib, Yovuzlar ustimga bostirib kelganda, Ha, gʻanimu dushmanlarim menga hujum qilganda, Qoqilib, yiqilib tushadilar.

³Hatto butun lashkar meni oʻrab olsa ham, Yuragimda aslo qoʻrquv paydo boʻlmas. Hatto menga qarshi jangga otlansa ham, Ishonchim hech ham yoʻqolmas.

⁴Bir narsani Egamdan soʻraganman, Ha, Undan istaganim bitta narsadir: Egamning uyida to abad yashay, Egamning jamolini koʻray, Ma’badda turib, Unga muntazir boʻlay.

⁵Kulfatda qolgan kunlarimda U meni Oʻz chaylasida omon saqlaydi. Chodiri ostida meni yashiradi, Baland qoya tepasiga oʻtqazib qoʻyadi.

⁶Endi esa har tarafdagi gʻanimlarim ustidan Boshim magʻrur koʻtarilgandir. Shodlikdan hayqirib, Egamning Chodirida qurbonlik keltiraman. Egamni olqishlab, qoʻshiq aytaman.

⁷Eshitgin, ey Egam, iltijo qilganimda, Shafqat qilgin, javob ber menga.

⁸“Menga intil!” deganingni qalbim eshitdi, Ha, ey Egam, men Senga intilaman.

⁹Mendan yuz oʻgirmagin, Gʻazab ila men, Oʻz qulingdan voz kechmagin, Madadkorim Sen boʻlgansan — ku, ey Egam. Rad etma, tark aylama meni, ey najotkorim Xudo!

¹⁰Ota — onam meni tark etsa hatto, Ey Egam, Sen meni qabul qilasan.

¹¹Yoʻlingni menga koʻrsat, ey Egam, Dushmanlarim poylab turgani uchun Meni toʻgʻri soʻqmoqlaringdan yetakla.

¹²Gʻanimlarim qoʻllariga topshirma meni. Axir, soxta guvohlar, nohaq ayblovchilar Menga qarshi chiqdilar.

¹³Shubham yoʻq, tiriklar diyorida Egamning ezguligini albatta koʻraman.

¹⁴Egamizga umid bogʻla, Dadil boʻl, yuragingga dalda ber, Egamizga umid bogʻla!