Read Uzbek Muqaddas Kitob Zabur 30 Bible Online

Zabur 30 - Uzbek Muqaddas Kitob bible

Zabur 30

¹Ijrochilar rahbariga. Dovud sanosi.

²Ey Egam, Senda men panoh topaman, Sharmanda boʻlishimga aslo yoʻl qoʻyma, Adolatlisan, meni qutqargin.

³Quloq tut menga, darrov xalos qilgin, Mening panoh qoyam boʻlgin. Najot topay, mustahkam qoʻrgʻonim boʻlgin.

⁴Chindan ham Sen suyangan qoyamsan, qal’amsan, Oʻz noming haqi meni yetakla, yoʻl koʻrsatgin.

⁵Sen mening panohimsan. Qoʻyilgan tuzoqdan meni qutqargin.

⁶Hayotimni Senga topshiraman, ey Egam, Meni qutqarasan, ey sodiq Xudo.

⁷Soxta xudolarni izzatlaganlarga Men nafratimni sochaman. Ey Egam, men Senga umid bogʻlayman.

⁸Sodiq sevging ila shod — xurram boʻlay, Qaygʻularimni Oʻzing koʻrgansan, Jonim azobda qolganini bilasan.

⁹Meni gʻanim qoʻliga bermading, Oyoqlarimni bexavotir yerga qoʻyding.

¹⁰Rahm qil, ey Egam, kulfatda qoldim, Koʻzlarim qaygʻudan toldi, Jonu tanam adoyi tamom boʻldi.

¹¹Hayotim azob bilan tugaydi, Yillarim oh — voh bilan bitadi. Gunohlarim[57] dastidan kuchdan qoldim, Etlarim suyaklarimga yopishib ketgan.

¹²Dushmanlarim meni haqorat qiladi, Qoʻshnilarim mendan hazar qiladi. Doʻstlarim ham mendan qoʻrqadi, Koʻchada koʻrib meni, qochib ketadi.

¹³Meni unutdilar, goʻyo oʻlganman, Goʻyo singan sopol idish kabiman.

¹⁴Eshityapman, koʻpchilik gʻiybat qiladi, Atrofimni dahshat oʻrab olgan. Birgalikda menga qarshi fitna toʻqishadi, Meni oʻldirmoqni niyat qilishadi.

¹⁵Ey Egam, men Senga umid bogʻlayman, “Mening Xudoyim Sensan”, deb aytaman.

¹⁶Hayotim Sening qoʻlingdadir, Gʻanimlarim qoʻlidan, Payimga tushganlardan meni qutqargin.

¹⁷Jamoling men, qulingga nurlarini sochsin, Sen sodiqsan, meni qutqargin.

¹⁸Yoʻl qoʻyma, ey Egam, sharmanda boʻlishimga, Madad soʻrab iltijo qildim Senga. Qabihlar sharmandayi sharmisor boʻlsin, Oʻliklar diyoriga[58] jim kirib borsin.

¹⁹Oʻchsin ularning yolgʻonchi ovozlari, Zero, takabburlik va nafrat bilan Ular solihga qarshi soʻylar.

²⁰O, naqadar buyukdir Sening ezguliging! Oʻzingdan qoʻrqqanlarga uni saqlab qoʻygansan, Senda panoh topganlarga hadya qilasan, Hammaning koʻzi oldida in’om qilasan.

²¹Huzuringda ularni himoya qilasan, Inson fitnalaridan omon saqlaysan. Ularni Oʻz chodiring ostida Igʻvolardan saqlab turasan.

²²Qamalda qolgan shaharday boʻlganimda Menga ajoyib sadoqatingni koʻrsatganing uchun Ey Egam, Senga olqishlar boʻlsin!

²³Vahimaga tushib men: “Ey Egam, Sening nazaringdan mahrum boʻldim”, degandim. Ha, madad soʻrab Senga yolvorganimda Iltijolarimni eshitding.

²⁴Ey Egamizning taqvodorlari, Uni seving! Unga sodiq boʻlganlarni Egamiz himoya qiladi, Takabburlarga toʻliq jazo beradi.

²⁵Bardam boʻling, dadil boʻlsin yuragingiz, Ey siz, Egamizdan umid qilganlar!